Vatican News

«Խաղաղ համակեցութեան ճանապարհը ընդելուզում է». Ֆրանչիսկոս Պապը հանդիպեցաւ Սլովաքիայի գնչուական համայնքի հետ։

«Քայլ առ քայլ ձերբազատուել անցեալի վախերից ու վէրքերից. ազնիւ աշխատանքով, ամենօրեայ հաց վաստակելու արժանապատւութեամբ, փոխադարձ վստահութիւն սնուցանելով, միմեանց համար աղօթելով, ինչը առաջնորդում և ուժ է տալիս»:

Վատիկան Նիուզ

Սրբազան Քահանայապետը սեպտեմբեր 14 ին, Պրաթիզլաւից յետոյ Սլովաքիայի երկրորդ ամենամեծ՝ Կոշիցէ քաղաքում, հանդիպել է գնչուների համայնքին:

Ունկնդրէ լուրը

Եկեղեցին բոլորի տունն է

Եկեղեցու շուրջը մէկ միասնական ընտանիք դառնալու գաղափարն էր համայնքի անդամներին ուղղուած Պապի ելոյթի մեխը, ով, շեշտել է, որ Աստուած բոլորիս՝ ինչպէս հայրը իր զաւակներին՝ իւրաքանչիւրն իր տարբերութիւններով և առանձնայատկութիւնով, ցանկանում է տեսնել Եկեղեցու շուրջը համախմբուած:

«Դուք մեծ սէր և յարգանք էք տածում ընտանիքի նկատմամբ և այս փորձառութեան հիման վրայ էք նայում Եկեղեցուն: Այո, Եկեղեցին տուն է, դա ձեր տունն է: Հետևաբար, ես կցանկանայի ձեզ ի սրտէ ասել. Ոչ ոք ձեզ կամ մէկ ուրիշին հեռու չի պահի Եկեղեցուց: Այն Եկեղեցուց, որը նոյն Հօրից ծնուած եղբայրների և քոյրերի ընտանիք է, որը մեզ տուեց Յիսուսին որպէս եղբայր, որպէսզի հասկանանք, թէ որքան է սիրում Նա եղբայրութիւնը», ասել է Սրբազան Քահանայապետը։

Փշրել կարծրատիպները և ազատուել նախապաշարմունքներից

Ֆրանչիսկոս Պապը կոչ է արել յաղթահարել բոլոր տեսակի կարծրատիպները և նախապաշարմունքները, ինչպէս նաև զրպարտչական խօսքերն ու վարուելակերպը, որոնք մէկը միւսին յաճախ կապուած են և մեծացնում են անջրպետը մարդկանց միջև, աղքատացնում են մարդկութեանը:

Պապը՝ համայնքի անդամների կեանքի անձնական օրինակների վրայ կառուցելով իր խօսքը, առանձնացրել է անձի նկատմամբ խնամքը, հովուական աշխատանքը, համբերութիւնը և իրական գործը, որոնց միջոցով հնարաւոր է ժամանակի ընթացքում քաղել պտուղները:

«Մի դատիր» (Մատթ. 7,1):

Ֆրանչիսկոսը յիշեցրել է այն ինչ ասում է Յիսուսն Աւետարանում. «Մի դատիր» (Մատթ. 7,1): Թէպէտև այդ պարզ ճշմարտութեանը՝ յաճախ ենք դառնում միւսների խիստ դատաւորները և դրան հակառակ չափազանց ներողամտութիւն ցուցաբերում սեփական անձի հանդէպ: Ճիշտ չէ նախապէս փաթաթեցուած տիպարներում կաղապարել դիմացինին՝ նուազեցնելով իրականութիւնը, շարունակել է իր միտքը Սրբազան Քահանայապետը և աւարտել. «Առաջին հերթին, միւսներին իսկապէս հասկանալու համար պէտք է ճանաչել նրանց. Ճանաչել, որ իւրաքանչիւրն իր մէջ կրում է Աստուծոյ զաւակի անկասելի գեղեցկութիւնը, որի մէջ արտացոլուած է Արարիչը»:

Խաղաղ համակեցութեան ճանապարհը ընդելուզում է

Ֆրանչիսկոսը ընդգծել է, որ խաղաղ համակեցութեան հասնելու և արժանապատուութիւնը վերականգնելու ճանապարհը ընդելուզումն է: Ընդելուզում ՝ երկխօսութեան ու փոխադարձ ճանաչողութեան միջոցով: Այն դանդաղ և կենսական գործընթաց է՝ ուղղուած ապագային: Եւ քանի որ ապագան պատկանում է երեխաներին, ապա, Քահանայապետի համոզմամբ, պէտք է այնպէս գործել, որպէսզի նրանց մեծ երազանքները պատնէշների չբախուեն:

Այսօր համարձակ ընտրութիւններ են անհրաժեշտ, որպէսզի ապագայում մեր զաւակները արժանապատիւ կեանքով ապրեն, կրթուեն ու գիտելիքներ ձեռք բերեն, որպէսզի «մեծանան արմատներով, միևնոյն ժամանակ չտեսնեն իրենց հնարաւորութիւնները արգելափակուած»:

Սրբազան Քահանայապետի շնորհակալական խօսքը ուղղուած էր բոլոր նրանց, ովքեր գործում են յանուն այդ ընդելուզումի, իրենց ժամանակը նուիրում անտեսուած եղբայրներին և քոյրերին, փախստականներին և կալանաւորներին, սոցիալապես անապահով խաւին, մինչդեռ կոչը՝ բոլորին. «Քայլ առ քայլ ձերբազատուել անցեալի վախերից ու վէրքերից. ազնիւ աշխատանքով, ամենօրեայ հաց վաստակելու արժանապատւութեամբ, փոխադարձ վստահութիւն սնուցանելով, միմեանց համար աղօթելով, ինչը առաջնորդում և ուժ է տալիս»:

14/09/2021, 16:39