Քահանայապետը աւարտեց Պուտաբեշտի այցելութիւնը եւ ուղղուեցաւ Սլովաքիա

Վատիկան Նիուզ

Կիրակի 12 սեպտեմբերի կէսօրին Պուտաբեշտի Հերոսներու հրապարակին վրայ մատուցած սուրբ Հաղորդութեան 52րդ համագումարը եզրափակող սուրբ զոհի աւարտին Սրբազան Քահանայապետը ուղղուեցաւ Պուտաբեշտի միջազգային օդակայան որտեղ Հունգարիայի այս կարճ այցին հրաժեշտի պաշտօնական արարողութիւնէն ետք բարձրացաւ օդանաւ փոխադրուելու համար ճամբորդութեան երկրորդ հանգրուան հանդիսացող` Սլովաքիայի մայրաքաղաք Պրաթիզլաւ ուր Քահանայապետին օդանաւը ժամանեց յիսուն վայրկեան տեւող թռիչքէ մը ետք։

Պրաթիզլաւի մէջ համամիութենական հանդիպում

Հազիւ Պրաթիզլաւ ժամանած Սրբազան Քահանայապետը Պապական Նուիրակութիւն փոխադրուելով  պիտի գլխաւորէ համամիութենական բնոյթ ունեցող հանդիպումին որուն պիտի մասնակցին տարբեր քրիստոնեայ եկեղեցիներու ներկայացուցիչները։

Աւարտին Սրբազան Պապը հանդիպում կ՜ունենայ Սլովաքիայի մէջ ծառայող Յիսուսեան միաբանութեան իր եղբայրակիցներուն հետ։