«Մնանք Եկեղեցւոյ գետին մէջ». Ֆրանչիսկոս Պապին Մարեմեան աղօթքի խորհրդածութիւնը։
Ռոպէր Աթթարեան - Վատիկան
Կիրակի 23 մայիս 2021-ի կէսօրին Ֆրանչիսկոս Սրբազան Քահանայապետը իր գրասենեակի պատուհանէն արտասանած Մարեմեան աղօթքի ընթացքին ներկայացուց օրուան տօնին, այսինքն Հոգեգալստեան տօնին վրայ կեդրոնացած խորհրդածութիւնը մը որուն սկիզբը Ան ակնարկեց Գործ Առաքելոցէն քաղուած օրուան խորհուրդին դէպքը պատմող հատուածին, ուր կը նշուի, թէ Յիսուսի յարութենէն յիսուն օր ետք, երբ աշակերտները Տիրամօր հետ միասին համախմբուած էին վերնատան մէջ յանկարծ զօրեղ մռնչիւն մը կը լսուի երկինքէն եւ ուժեղ քամի մը կը լեցնէ տունը։
Սուրբ Հոգին ուժեղ եւ ազատ քամիի նման է
«Այս կը յայտնէ թէ Սուրբ Հոգին ուժեղ եւ ազատ քամիի նման է։ Կարելի չէ զայն կառավարել, կանգնեցնել եւ ոչ ալ չափել» ըսաւ Սրբազան Պապը աւելցնելով, որ Հոգին կը բխի Հօր Աստուծմէ եւ Անոր զաւկէն Յիսուս Քրիստոսէն ու մուտք կը գործէ Եկեղեցւոյ մէջ, մեզմէ իւրաքանչիւրիս վրայ, կեանք պարգեւելով մեր մտքերուն ու սրտերուն։
«Ան կեանք պարգեւող Տէրն է, ինչպէս կ՛ըսէ հաւատամքը» յարեց Սրբազան Քահանայապետը դիտել տալով թէ «առաքեալները Պենտեկոստէի օրը տակաւին ուղեկորոյս ու մոլորուած էին» մեզի նման, «որ շատ անգամ կը նախընտրենք մնալ մեր շրջանակը պահպանող պատերուն մէջ»։
Սուրբ Հոգին մեզ կը դարձնէ նոր արարածներ
«Տէրը սակայն գիտէ ինչպէս հասնիլ մեզի, Ան մեզի կը ղրկէ Սուրբ Հոգին, որ մեզ կը պարուրէ ու կը յաղթէ մեր տատամսումները ու մեզ կը դարձնէ նոր արարածներ այնպէս ինչպէս ըրաւ առաքեալներուն հետ» ըսաւ Սրբազան Պապը մատնանշելով թէ ինչպէս անոնք Սուրբ Հոգին ընդունելէ ետք սկսան անվախ քարոզել Յարուցեալ Քրիստոսը։
«Սուրբ Հոգին փոխեց աշակերտներուն սրտերը ու անոնց հայեացքը եւ զանոնք դարձուց կարող հաղորդելու Աստուծոյ գործերը գերազանցելով մշակութային, կրօնական սահմանները, որոնց մէջ վարժ էին ապրիլ ու մտածել։ Ան զանոնք կարող կը դարձնէ հասնիլ բոլորին, այլ բառերով Սուրբ Հոգին իրար միջեւ հաղորդակցութեան մէջ կը դնէ տարբեր անձեր իրականացնելով միութիւն ու Եկեղեցւոյ տիեզերականութիւնը» հաստատեց Սրբազան Պապը որ ապա ընդգծեց թէ Եկեղեցւոյ մէջ գոյութիւն ունեցող բաժանումները Աստուծոյ Հոգիին չեն համապատասխաներ։
Մնալ Եկեղեցւոյ մէջ
«Աստուծոյ Հոգին ներդաշնակութիւն է, միութիւն է, ան կը միացնէ տարբերութիւնները» հաստատեց Սրբազան Պապը մէջբերելով Ճենովայ քաղաքի երբեմնի Արքեպիսկոպոսին խօսքերը որ ըսած է. Եկեղեցին նման է գետի, կարեւորը մէջը մնալն է, եթէ դուն անոր մէկ ծայրը կամ միւս ծայրը երթաս կարեւոր չէ. Սուրբ Հոգին միութիւնը կը գործէ։ «Կարեւոր է որ մենք Սուրբ Հոգիին միութեան մէջ մնանք եւ ոչ թէ մէկ կամ միւս ծայրը» յարեց Սրբազան Պապը նշելով որ Եկեղեցին կը պատկանի բոլորին այնպէս ինչպէս զայն ցոյց տուաւ Սուրբ Հոգին Պենտեկոստէին օրը։
Նորին Սրբութիւնը խորհրդածութիւնը աւարտեց հրաւիրելով Սուրբ Կոյս Մարիամին ու անոր բարեխօսութեան որպէսզի Սուրբ Հոգին իջնէ առատութեամբ ու լիացնէ հաւատացեալներուն սրտերը ու բոլորին մէջ վարէ իր սիրոյն կրակը։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ