Ֆրանչիսկոս Պապին ցաւակցութիւնը՝ Թեհրանի մօտ Ուքրանական օդանաւին մը ջախջախումի ի լուր:
Վազգէն Աբարդեան - Վատիկան
Չորեքշաբթի, 8 յունուարին, Ուքրանական օդանաւի մը ջախջախումի ի լուր, Վատիկանի Պետական քարտուղար, Կարդինալ Փիեթրօ Փարոլին, ցաւակցագիր մը յղեց՝ Ֆրանչիսկոս Պապին անունով:
Յայտնենք, թէ Ուքրանական «Պոյինկ 737» օդանաւ մը Իրանի «Իմամ Խումէայնի» օդակայանէն թռիչք առնելէ ետք ջախջախուած է: Անոր մէջ գտնուող 180 անձեր մահացած են:
«Մեծ տխրութեամբ իմանալով Ուքրանական օդանաւի ջախջախումի լուրը, զոր պատահեցաւ Թեհրանի մօտակայքը, Ֆրանչիսկոս Պապ Ամենակալին ողորմած սիրոյն կը յանձնէ զոհերուն հոգիները եւ իր ցաւակցութիւնները կը յայտնէ զոհերու հարազատներուն եւ բարեկամներուն: Սրբազան Պապը աղէտի թիրախ անձերուն համար, Աստուծոյ՝ խաղաղութեան եւ զօրութեան աստուածային օրհնութիւնները կը հայցէ»: Գրած է ցաւակցագիրին մէջ Կարդինալ Փարոլին:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ