Որոնել

Vatican News
Ֆրանչիսկոս Պապ Ֆրանչիսկոս Պապ  (Vatican Media)

Ֆրանչիսկոս Պապ ընդունեց Սուրբ Ծննդեան համերգի արուեստագէտները:

Ծնելով մսուրին մէջ, Աստուած ինքն է, որ կը սկսի միակ եւ իսկական յեղափոխութեան: Սիրոյ եւ անուշութեան յեղափոխութիւն:

Վազգէն Աբարդեան - Վատիկան

Ուրբաթ, 13 դեկտեմբերին, առաւօտեան, Վատիկանի մէջ ֆրանչիսկոս Պապ ընդունեց վատիկանի մէջ կայանալիք Յիսուսի Սուրբ Ծննդեան համերգի երաժիշտներն ու արուեստագէտները, ինչպէս նաեւ համերգի կազմակերպիչները:

Ունկնդրէ լուրը

Ողջոյնի խօսքին մէջ ֆրանչիսկոս Պապ, Յիսուսի Սուրբ Ծնունդի տօնի նախապատրաստական շրջանը առիթ նկատեց մենք մեզի հարց տալու թէ ի՞նչ կ՝ակնկալենք մեր կեանքէն, եւ մեր սիրտը ի՞նչ կը փափաքի:

Ան նշեց, թէ Աստուած  է որ, մեր սիրտին մէջ զետեղած է այդ փափաքը ու ծարաւը: Աստուած ինքն է, որ կու գայ եւ կը հանդիպի այս ուղիին վրայ: Ան չի գար ունեցուածքի եւ պատկանելիութեան ունայնութիւններուն ներքո՛յ, այլ կու գայ հոն ուր՝ խաղաղութեան, արդարութեան, ազատութեան եւ սիրոյ ծարաւն ու անօթութիւնը կայ:

Ֆրանչիսկոս Պապ ապա ակնարկելով Սուրբ մսուրի արժանիքի եւ իմաստին մասին վերջերս հրապարակած իր առաքելական պատգամին, նշեց որ մսուրէն ի յայտ կու գայ սա պատգամը, թէ չենք կրնար մենք մեզի թոյլ տալ խաբուելու հարստութենէն, եւ վաղանցիկ երջանկութենէն: Ծնելով մսուրին մէջ, Աստուած ինքն է, որ կը սկսի միակ եւ իսկական յեղափոխութեան: Սիրոյ, եւ անուշութեան յեղափոխութիւն: 

Ֆրանչիսկոս Պապ ապա մէջբերեց Սուրբ Պօղոս Զ Պապին արուեստագէտներու յղած խօսքէն հատուած մը: Աշխարհը գեղեցկութեան կարիքը ունի,  որպէսզի չընկղմի յուսահատութեան մէջ: Գեղեցկութիւնն ու ճշմարտութիւնը մարդոց սիրտերուն մէջ յարուցանող ուրախութիւն է, է նաեւ այն թանկարժէք պտուղը, որ կը դիմադրէ ժամանակի մաշուածութեան եւ կը միացնէ սերունդները՝ անոնց հաղորդելով հիացմունքի մէջ:

Ֆրանչիսկոս Պապ ապա ընդգծեց, որ բոլորս կանչուած ենք կառուցելու կրթութեան համաշխարհային քաղաք մը , որուն մէջ բնակող ամէն մի անհատ կը ստեղծէ մարդկային յարաբերութիւններու ցանց մը, յարաբերութիւններ, որոնք լաւագոյն դեղն են խտրականութեան եւ մեկուսացումի որեւէ ձեւի ընդէմ:

Այս քաղաքին մէջ կրթութիւնն ու արուեստը իրարու կը հանդիպին երաժշտութեան, բանաստեղծութեան, լեզուներու , քանդակագործութեան միջոցաւ: Այս բոլորը՝ մարդկային ստեղծագործութեան արտայայտութիւնները կրնան դառնալ, եղբայրութեան խողովակներ, մարդկային ընտանիքի ժողովուրդներու միջեւ,  խաղաղութեան ինչպէս նաեւ կրօններու  միջեւ երկխօսութեան խողովակներ:

Ֆրանչիսկոս Պապ խօսքը աւարտեց շնորհակալութիւն յայտնելով արուեստագէտներուն իրենց սատարած նպաստին համար մաղթելով ամէն բարիք, անոնց գործունէութեան եւ հոգեւոր ուղեւորութեան: 

13/12/2019, 13:00