Ֆրանչիսկոս Պապին կոչը Չիլիի մէջ անկարգութիւններու ի տես:
Վազգէն Աբարդեան - Վատիկան
Չորեքշաթի, 23 հոկտեմբերին, Սուրբ Պետրոսի հրապարակի վրայ կատարած ընդհանուր ունկնդրութեան աւարտին Ֆրանչիսկոս Սրբազան Պապը կոչ ըրաւ ի նպաստ Չիլիի
Կոչին մէջ սրբազան հայրը ըսաւ.
«Մտահոգութեամբ կը հետեւիմ Չիլիի մէջ տեղի ունեցած իրադարձութիւններուն: Մաղթանքս է, որ երկխօսութեան միջոցաւ վերջ դրուին բռնի ցոյցերուն եւ աշխատանք տարուի տագնապի լուծման եւ անկէ յառաջացած դժուարութիւնները դիմագրաւելու ի խնդիր, համայն ժողովուրդի բարիքի համար:» ըսաւ Ֆրանչիսկոս Պապ Չիլիի ի նպաստ ըրած կոչին մէջ:
Յայտնենք, թէ Չիլիի մէջ բողոքի ցոյցերն ու անկարգութիւնները կը շարունակուին: Մինչեւ այսօր արձանագրուած է առնուազն 13 զոհ:
Չիլիի նախագահ Սեբաստիան Պինյերան երկրի անկարգութիւններուն հետ կապուած իրադարձութիւնները համեմատած է պատերազմի հետ:
Բողոքի ցոյցերը սկիզբ առած են Սանթիակօ մայրաքաղաքի մեթրոյի սակի բարձրացման պատճառաւ: Հակառակ, որ Չիլիի նախագահը չեղեալ նկատած է մեթրոյի ուղեվարձը բարձրացնելու որոշումը, երկրին մէջ կը շարունակուին անկարգութիւնները:
Վերջին օրերը, ցուցարարները այրած են մեթրոյի մի քանի կայարաններ եւ հանրակառքեր:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ