Ֆրանչիսկոս Պապ ընդունեց սառոյցի վրայ Hockey-ի միջազգային դաշնութեան անդամները:
Վազգէն Աբարդեան - Վատիկան
Ուրբաթ, 27 սեպտեմբերին, Վատիկանի մէջ ֆրանչիսկոս Պապ ընդունեց սառոյցի վրայ Hockey միջազգային դաշնութեան անդամները:
Ողջոյնի խօսքին մէջ Սրբազան Հայրը մարզանքը նկատեց յատուկ միջոց մը՝ խաղաղութեան եւ միութեան ի խնդիր դիտել տալով, որ մարզական գործունէութիւնները հանդիպումի վայրեր են, ուր միասնաբար կը փութան տարբեր միջավայրերէ ժամանած անձեր:
Սառոյցի վրայ hockey-ն, խմբային խաղ մըն է, ուր իւրաքանչիւր խաղացող ունի կարեւոր դեր մը կատարելիք: Ան ընդգծեց նաեւ, որ մարզանքը ունի այլ դեր մը՝ համապարփակ զարգացման ոլորտէն ներս եւ այս իսկ պատճառաւ եկեղեցին կը գնահատէ մարզանքը, որպէս մարդկային գործունէութիւն, ուր կարելի է զարգացնել հեզութեան, քաջութեան, համբերութեան առաքինութիւնները եւ ուր կարելի է վկայել գեղեցիկ, ճշմարիտ եւ ուրախալի իրողութիւններու հետ հանդիպումը:
Ֆրանչիսկոս Պապ գնահատեց եւ բարձր արժեւորեց սառոյցի վրայ hockey խաղերու միջազգային դաշնութեան ղեկավարներուն՝ hockey-ի մարզանքը համաշխարհային գետնի վրայ հասանելի եւ նեռարական դարձնելուն համար:
Ան իր ուրախութիւնը յայտնեց նաեւ, որ դաշնութեան վերջին վաւերացուած սահմանադրութեան մէջ ներառուած է բարոյական նոր խորհուրդ մը, նկատել տալով որ երբեմն կարգ մը մարզական ձեռնակները կ՝առաջնորդեն սխալ ճամբաներուն վրայ:
Ֆրանչիսկոս Պապ եզրափակեց իր խօսքը քաջալերելով դաշնութեան անդամները յառաջ երթալու՝ մարզանքը ներառական վերածելու իրենց առաքելութեան մէջ:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
