Ֆրանչիսկոս Պապ պիտի զրուցէ տարեցներու եւ երիտասարդներու հետ։

Ռոպէր Աթթարեան - Վատիկան

Երեքշաբթի 23 հոկտեմբեր 2018-ի յետմիջօրէի 4-ին, Հռոմի «Աուկուսթինիանում» հաստատութեան մօտ, Երիտասարդներու հայող եպիսկոպոսական սիւնհոդոսին ծիրէն ներս, տեղի կ՛ունենայ «Ժամանակի իմաստութիւնը» խորագիրով յատուկ ձեռնարկ մը, որուն ընթացքին նախատեսուած է Քոլոմպիայէն, Իտալիայէն, Մալթայէն եւ Միացեալ Նահանգներէն ժամանած խումբ մը երիտասարդներու ու տարեցներու հետ Ֆրանչիսկոս Պապին զրոյցը։ Տարեցներու շարքին է նաեւ աշխարահռչակ Ռեժիսսոր Մարթին Սքորսեզէն։

Ձեռնարկը՝ որուն իրենց մասնակցութիւնը կը բերեն Փանամայի Արքեպիսկոպոսը՝ Խօսէ Տոմինկօ Ուլլոա Մենտիեթա եւ Հայր Անթոնիօ Սփատարօ՝ Յիսուսեաններու «Չիվիլթա Քաթթոլիքա» պարբերաթերթին տնօրէնը, ներկայացումն է համընդհանուր մէկ ծագրի մը որուն նպատակն է սերունդներու միջեւ նոր դաշինք մը հաստատել։ Ծրագիրի ծիրէն ներս նախատեսուած է նաեւ ինը լեզուներով հրապարակուելիք գիրգի մը հրատարակութիւնը։

«Ժամանակէ ի վեր սրտիս մէջ ունիմ գաղափար մը։ Կը զգամ թէ Տէրը կ՛ուզէ որ ես այս ըսեմ. թող նոր դաշինք մը ստեղծուի տարեցներու ու երիտասարդներու միջեւ» Ֆրանչիսկոս Պապին սոյն ներշնչումի վրայ հիմնուելով  է որ ծնունդ առաւ վերոնշեալ «Ժամանակի իմաստութիւնը բաժնեկցիր» խորագիր կրող ծրագիրը։

Երիտասարդներու եւ տարեցներու հետ հանդիպումը սկիզբ կ՛առնէ ժամը 16-ին, «Իմաստութեան դէմքեր» ժապաւէնի ցուցադրութեամբ ու Հռոմի երգչախումբի ելոյթով որմէ ետք խօսք կ՛առնեն Գերապայծառ Ուլլոա Մենտիեթան որ է նաեւ Փանամայի մէջ կայանալիք 2019-ի երիտասարդներու համաշխարհային հաւաքի կազմակերպիչ կոմիտէի նախագահը եւ Հայր Անթոնիօ Սփատարոն ապա տեղի կ՛ունենայ Ֆրանչիսկոս Պապին ու հաւաքին ներկայ գտնուող  տարեցներուն ու երիտասարդներուն միջեւ զրոյցը։