Ֆրանչիսկոս Պապ ունկնդրութիւն կը շնորհէ Գարեգին Բ Ամենայն Հայոց կաթողիկոսին։

Ռոպէր Աթթարեան - Վատիկան

Չորեքշաբթի 24 հոկտեմբեր 2018-ի յետմիջօրէի 5-ին Ֆրանչիսկոս Սրբազան Քահանայապետը ունկնդրութիւն կը շնորհէ Գարեգին Բ Ամենայն Հայոց կաթողիկոսին ու անոր ընկերացող պատուիրակութեան։

Հոկտեմբեր 20-ին Ամենայն Հայոց Կաթողիկոսը Իտալիոյ հայոց հովուական հոգեւոր դասի ու վարչական խորհուրդի հրաւէրով ժամանած է Իտալիա, ուր 21 հոկտեմբերին հադիսապետեց Միլանի Սուրբ Քառասուն Մանկանց եկեղեցւոյ կառուցման 60-ամեակին նուիրուած արարողութիւնը:

Միլան կեցութեան ընթացքին  Գարեգին Բ՝ 20 հոկտեմբերին, հանդիպում ունեցաւ նաեւ  Միլանի  Կաթողիկէ  եկեղեցւոյ առաջնորդ՝   Գերապայծառ Մարիօ Տելփինիի  հետ, իսկ երեկոյեան, Վեհափառ Հայրապետը Միլանի «Հայ Տուն» կեդրոնին մէջ հանդիպում ունեցաւ  Միլանի հայ առաքելական եկեղեցւոյ հովանիին ներքոյ գործող  երիտասարդական կազմակերպութեան վարչական խորհուրդի  անդամներու և  երիտասարդներու հետ։

Իսկ 21 հոկտեմբերի երեկոյեան, միշտ Միլանի հայ Տան մէջ տեղի ունեցաւ Վեհափառ Հայրապետի ու անոր ընկերացող շքախումբի ի պատիւ հիւրասիրութիւն որուն հրաւիրուած էր մասնակցելու ողջ համայնքը: Ապա երեքշաբթի 23 հոկտեմբեր 2018-ի երեկոյեան Գարեգին Բ Հռոմի Սուրբ Վլասի անուան հայ կաթողիկէ եկեղեցւոյ մէջ գլխաւորեց աղօթքի արարողութիւն մը որուն իրենց մասնակցութիւն բերին նաեւ հռոմաբնակ հայ հաւատացեալներ։