Իրլանտայի մէջ Տիրամօր նուիրուած Քնոք սրբավայրը կը սպասէ Ֆրանչիսկոս Պապին
Վազգէն Աբարդեան - Վատիկան
Յառաջիկայ օգոստոս 26-ին, Ֆրանչիսկոս Պապ Տապլինի ընտանիքներու համաշխարհային հաւաքին օրուան առիթով, Իրլանտա կատարելիք առաքելական ճամբորդութեան ծիրէն ներս պիտի այցելէ նաեւ «Քնոք» Տիրամօր սրբավայրը, որ կը գտնուի Իրլանտայի հիւսիս արեւմտեան «Մայօ» շրջանին մէջ:
Կաթողիկէ իրլանտացիներուն սիրտը գրաւող Մարեմեան Քնոք Սրբավայրին մէջ այսօր՝ 14 օգոստոսին սկիզբ կ՝առնէ Տիրամօր նուիրուած, «Հաւատք եւ ընտանիք» կարգախօսով աւանդական իննօրեայ աղօթքի նախաձեռնութիւնը, որ առնչուած է Տապլինի ըտանքիքներուն համաշխարահային հանդիպումին:
Արժանի է անդրադառնալ Սրբավայրին հակիրճ պատմականին
21 օգոստոս 1879-ին, տեղատարափ անձրեւի օր մը, Քնոք գիւղին մէջ, 6-75 տարիք ունեցող 15 հաւատացեալներ ականատես կ՝ըլլան Տիրամօր երեւումին, որ կը յայտնուի ժողովրդապետութեան փոքրիկ եկեղեցոյ տանիքին վրայ:
Աւանդութեան համաձայն կը պատմուի թէ երեւցած Տիրամօր կողքին կը գտնուէին երկու երեւելի դէմքեր, Սուրբ Յովսէփն ու Սուրբ Յովհաննէս Աւետարանիչը:
Տիրամօր Երեւումէն յափշտակուած 15 հաւատացեալները, կը շարունակեն աղօթել տեղտարափ անձրեւին տակ ՝ առանց թրջուելու:
Հրաշալի եւ տպաւորիչ դէպքէն մի քանի շաբաթ վերջ Տիրամօր երեւումի հրաշքը կը ցնցէ ամբողջ Իրլանտան: Եկեղեցական իշխանութեան հրամանով կը կազմուի յանձմախումբ մը քննարկելու համար Տիրամօր երեւումին ականատես եղած վկաներուն ստուգութիւնը:
1979-ին, Սուրբ Յովհաննէս Պօղոս Բ. Պապը այցելած է Քնոք Տիրամօր սրբավայրը շրջապատուած աւելի քան 500 հազար հաւատացեալներով:
Ամէն տարի Քնոք Սրբավայրը յաճախուած է աւելի քան մէկ ու կէս միլոն ուխտաւորներէ:
1940ին օգոստոս ամսոյն, 50 հազարէ աւելի հաւատացեալներ իրենց մասնակցութիւնը կը բերեն Սրբավայրին մէջ կազմակերպուած Իրլանտայի եւ համայն աշխարհին խաղաղութեան ի սպաս կատարուած ուխտագնացութեան:
1954ին, Պիոս ԺԲ. Պապին կողմէ հռչակուած Մարեմեան տարուան առթիւ, աւելի քան մէկ ու կէս միլիոն ուխտաւորներ կ՝այցելեն Քնոքի Տիրամօր Սրբավայրը ուր երջանկայիշատակ քահանայապետին հրամանով տեղի կ՝ունենայ Տիրամօր արձանի թագադրութեան արարողութիւնը:
Տիրամօր երեւումներէն մէկ դար վերջ, փոքրիկ եկեղեցւոյ տարածքին վրայ կը կառուցուի Տիրամօր նուիրուած սրբավայր մը որուն առաջին քարի օրհնութիւնը կը կատարէ, Երանելի Պօղոս Զ. Պապը 1973-ին, ապա անոր բացման արարողութիւնը տեղի կ՝ունենայ 18 յուլիս 1979ին:
Քնոքի Տիրամօր Սրբավայրին մէջ կան 5 մատուռներ նուիրուած՝ Քնոքի Տիրամօր, Սուրբ Յովհաննէս Աւետարանիչին, Յիսուսի Սուրբ Սիրտին եւ Սուրբ Քոլոմպիանի։
Սրբավայրի կառուցման աշխատանքը, կատարուած 1967-1986 թուականներուն, կը պարտինք սրբավայրին ժողովրդապետ հայր Ճամս Հորանի: Ան ճանչուած է որպէս «Քնոքի կառուցողը», ոչ միայն սրբավայրին կառուցման աշխատանքներուն համար այլեւ Քնոք քաղաքին մէջ միջազգային օդակայանի ծրագիրը իրականացնելուն համար:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ