Ֆրանչիսկոս Պապ աղօթեց երանելի Պօղոս Զ Պապին շիրիմին առջեւ
Վազգէն Աբարդեան - Վատիկան
Երանելի Պօղոս Զ. Պապին մահուան 40-րդ տարեդարձին առիթով, երկուշաբթի, օգոստոս 6-ին, ֆրանչիսկոս Սրբազան Քահանայապետը այցելած է Սուրբ Պետրոսի տաճարին մէջ գտնուող Քահանայապետներու դամբարանը, եւ հոն աղօթած է երջանկայիշատակ Երանելի Պօղոս Զ. Պապի շիրիմին առջեւ:
Պօղոս Զ. Երանելի Քայանայապետը, որուն մահուան 40-րդ տարեդարձը նշուեցաւ 6 օգոստոսին, հոգին աւանդած էր առ Աստուած՝ 1978-ին Քասթել Կանտոլֆօ քահանայապետական ամարանոցին մէջ:
Անոր քահանայապետութեան ժամանակաշրջանը տեւած է 15 տարի՝ սկսեալ 21 յունիս 1963-էն: Ան կաթողիկէ եկեղեցւոյ պատմութեան համար նկատուած է երեւելի եւ փայլուն անձերէն մին , ոչ միայն որովհետեւ իր աւարտին հասցուցած է Վատիկանեան Տիեզերական Բ. Ժողովը այլ իր «Մարդկային կեանք» շրջաբերականով մեծապէս նպաստած է կեանքի եւ ամուսնութեան վերաբերող եկեղեցւոյ վարդապետութեան. շրջաբերական մը, որուն 50 ամեակը նշուեցաւ այս տարի:
Յիշենք նաեւ որ ֆրանչիսկոս Պապ, կիրակի 4 օգոստոսին, կիրակնօրեայ Մարեմեան աղօթքի ժամանակ ներկայացուցած խորհուրդածութեան աւարտին ոգեկոչեց Երանելի Պօղոզ Զ. Պապին՝ Հօրենական տուն վերադարձը, նկատելով Մոնթինի Քահանայապետը արդիականութեան մեծ Պապ:
Ֆրանչիսկոս Պապ ըսաւ.
«Մեծ երախտագիտութեամբ եւ համակրանքով կը յիշենք Երանելի Պօղոս Զ Պապը սպասելով, որ ան սրբադասուի՝ 14 հոկտեմբեր 2018-ին»:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
