Ֆրանչիսկոս Պապին քարոզը «Աստուծոյ առջեւ մենք մեզ մեղադրելով է որ, կ՝ազատինք կեղծաւորութենէն:
Վազգէն Աբարդեան - Վատիկան
Երեքշաբթի, 15 հոկտեմբերին,Վատիկանի Տոմուս Սանթա Մարթա մատրան մէջ մատուցած Սուրբ պատարագի ընթացքին արտասանած քարոզին մէջ Ֆրանչիսկոս Պապ խօսեցաւ կեղծաւորութեան մասին:
Թելադրուած օրուան սուրբ գրային ընթերցումէն, ուր կը խօսուի Յիսուսի մասին, որ Փարիսեցիի ճաշին հիւրն է, ֆրանչիսկոս Պապ ըսաւ « Կայ Կեցուածք մը, որ Յիսուս չի հանդուրժեր, անիկա կեղծաւորութիւնն է: Այս է որ կը պատահի այսօրուան աւետարանին մէջ: Յիսուս ճաշի հիւրն է Փարիսեցի մը մօտ: Յիսուս ճաշի սեղան նստելէ առաջ կը քննադատուի տանտիրոջ կողմէ, որովհետեւ չյարգեց սովորութիւնները, ըսաւ ֆրանչիսկոս Պապ աւելցնելով «Յիսուսը ճաշի հրաւիրած էին, ոչ թէ Անոր հետ բարեկամութիւն մշակելու համար, այլ Զինք քննադատելու:
Կեղծաւորութիւնը, իսկապէս տարբեր ձեւով երեւնալն է ու տարբեր ձեւով ներկայանալ է : Երեւնալէն՝ տարբեր ձեւով գաղտնաբար մտածել է : ըսաւ Սրբազան Հայրը ապա շեշտեց «կեղծաւորութեան կեցուածքը, յառաջ կու գայ ամենամեծ ստախօսէն՝ սատանայէն: Ան ամենամեծ ստախօսն է եւ կեղծաւորները անոր ժառանգորդները: Այս կեցուածքէն բուժուելու միակ դեղը՝ Աստուծոյ առջեւ ճշմարտութիւնը ըսելն է, մենք մեզ մեղադրելն է, ճանչնալով մեր մեղքերը:
Ֆրանչիսկոս Պապ քարոզը եզրափակեց նշելով «Քրիստոնեայ մը որ չգիտեր ինքզինք մեղադրել՝ Աստուծոյ առջեւ, բարի քրիստոնեայ չէ, ան միշտ ենթարկուած է կեղծաւորութեան վտանգին: »
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ