Հալէպի մէջ Ռաֆայէլ Պետրոս ԻԱ Մինասեան Հոգեւոր Տիրոջ հանդիպումները

Ամենապատիւ Հոգեւոր Տիրոջ հանդիպումները Հալէպի մէջ

Հայ Կաթողիկէ Պատրիարքութեան տեղեկատուական գրասենեակը կը տեղեկացնէ թէ «Հալէպ կատարած իր հովուապետական այցելութեան չորրորդ օրը, Տանն Կիլիկիոյ Կաթողիկէ Հայոց Ամենապատիւ եւ Գերերջանիկ Տէր Ռաֆայէլ Պետրոս ԻԱ. Մինասեան Կաթողիկոս Պատրիարքը ընդունեցաւ Հալէպի Եկեղեցիներու հոգեւոր պետերը, քահանայ հայրերը եւ միաբան քոյրերը, ինչպէս նաեւ Հալէպի Միւֆթին՝ Շէյխ դոկտոր Մահմուտ Ուքամը, Հալէպի կալուածներու կառավարման գրասենեակի տնօրէն տիար Րամի ըլ-Ապիտը, Հալէպի նահանգապետ՝ Հիւսէյն Տիապը, այլազան հաստատութիւններու եւ դպրոցներու ներկայացուցիչներ, ուսուցիչներ, բարեսիրական ու սկաուտական շարժումներու պատասխանատուներ, յանձնախումբեր եւ հաւատացեալներ:

Հանդիպումներուն ներկայ գտնուեցան՝ Բերիոյ Հայ Կաթողիկէ թեմի առաջնորդ՝ Արհի. Պետրոս Արք. Միրիաթեան, Աղեքսադրիոյ Հայ Կաթողիկէ թեմի առաջնորդ՝ Արհի. Գրիգոր Եպս. Գուսա, Պատրիարքական թեմի օգնական եպիսկոպոս՝ Արհի. Գէորգ Եպս. Ասատուրեան, Յունաստանի Հայ Կաթողիկէ թեմի Առաքելական Կառավարիչ՝ Յովսէփ Ծ.Վ. Պէզէզեան եւ շարք մը քահանայ հայրեր:

Խօսքերը շեշտեցին Ամենապատիւ Հոգեւոր Տիրոջ հովուապետական այցելութեան կարեւորութեան վրայ, անդրադառնալով մէկ կողմէն անոր մեծ նշանակութեան այս դժուար պայմաններուն եւ միւս կողմէն՝ վերահաստատելով Եկեղեցւոյ դիրքը իր զաւակներու կողքին:

Հաւատացեալ ժողովուրդը իր կարգին արտայայտեց իր հրճուանքը այս հովուապետական այցելութեան առիթով, որ յոյս ու մխիթարանք կը ներշնչէ եւ որ իր գագաթնակէտին հասաւ Ներսէս Յովսէփ թ.ծ.վ. Զապարեանի եպիսկոպոսական ձեռնադրութեամբ:

Ամենապատիւ Հոգեւոր Տիրոջ հանդիպումները

Այցելուներու շարքին եղաւ նաեւ Բերիոյ Հայոց Թեմի Առաջնորդ Գերշ. Տէր Մակար Սրբ. Եպս. Աշգարեանը, ինչպէս կը կարդանք Գանձասարի էջերէն ուր նշուած է, թէ «Սրբազան Հօր կ՚ընկերակցէին Առաջնորդի Օգնական Հոգշ. Տ. Մանուկ Վրդ. Պարիխանեան եւ Ազգ. Վարչութեան անդամ Մանուէլ Տէր Մանուէլեան»։

Հայ Կաթողիկէ համայնքի Առաջնորդարանին մէջ տեղի ունեցած հանդիպումին, Մակար Սրբազան բարի գալուստ մաղթեց Նորին Ամենապատուութեան, դիտել տալով որ Պատրիարք Հօր այցելութիւնը ոգեւորիչ ազդակ է սուրիահայութեան ապրած այս ծանր օրերուն եւ խթան վերականգնումի աշխատանքներուն։

Իր կարգին Պատրիարք հայրը շնորհակալութիւն յայտնելով այցելութեան համար շեշտեց յարանուանութիւններու կարեւոր դերը սուրիական ընկերութեան ընդհ. խճանկարին մէջ եւ բարեբեր օրեր մաղթեց սուրիահայութեան, յոյս յայտնելով որ միասնական աշխատանքով կարելի կը դառնայ յաղթահարել երկրի տնտեսական դժուարութիւնները ու սատարել սուրիական հայրենիքի վերականգնումին։

ՀՈԳԵՒՈՐ ՏԷՐԸ ՆԵՐԿԱՅ ԿԸ ԳՏՆՈՒԻ «ԳԱՌՆԻ» ՊԱՐԱԽՈՒՄԲԻ ԵԼՈՅԹԻՆ

Երկուշաբթի, 28 Օգոստոսին, «Գառնի» պարախումբը գեղարուեստական գեղեցիկ ելոյթով մը հանդէս եկաւ Հալէպի «Սուրբ Երրորդութիւն» եկեղեցիին «Աղաճանեան» սրահին մէջ, ներկայութեամբ Տանն Կիլիկիոյ Կաթողիկէ Հայոց Ամենապատիւ եւ Գերերջանիկ Տէր Ռաֆայէլ Պետրոս ԻԱ. Մինասեան Կաթողիկոս Պատրիարքի, Բերիոյ Հայ Կաթողիկէ թեմի առաջնորդ՝ Արհի. Պետրոս Արք. Միրիաթեանի, եպիսկոպոսական հայրերու, քահանաներու, միութենականներու եւ հաւատացեալներու:

Գեղարուեստական ելոյթը ընդգրկեց հայ մշակոյթէն ժառանգուած պատկերազարդ ու ստեղծագործ ներկայացումներ:

Ելոյթէն ետք, Բերիոյ Հայ Կաթողիկէ թեմի առաջնորդ՝ Արհի. Պետրոս Արք. Միրիաթեան երախտագիտական խօսք մը ուղղեց, բարձր գնահատելով երգչախումբին կատարած ներկայացումները եւ շնորհակալութիւն յայտնելով Ամենապատիւ Հոգեւոր Տիրոջ, որ սիրով ընդառաջեց հրաւէրին: Ան նշեց, թէ «Գառնի» պարախումբը միացուց աշխարհի տարբեր մշակոյթները հայկական պատկերազարդ ներկայացումներով ու երաժշտութեամբ:

Իր կարգին, Մինասեան Հոգեւոր Տէրը շնորհակալութիւն յայտնեց պարախումբին եւ անոր ստեղծագործական կատարողութեան, մաղթելով որ հայ ժողովուրդը կառչած մնայ իր մշակութային ժառանգութեան:

Յիշենք, որ «Գառնի» պարախումբը հիմնուած է՝ 2013-ին, Վրէժ Թէրզեանի եւ Անուար Գիւրիւմլեանի նախաձեռնութեամբ: Ան իր մասնակցութիւնը բերած է զանազան փառատօններու եւ թատրերգութիւններու, ինչպէս նաեւ Հալէպի 2018-ի փառատօնին: Ան պարի ելոյթներ ունեցած է Հայաստանի հանրապետութեան անկախութեան տօնին առիթով՝ 2018-ին եւ այլ տօնախմբութիւններու ընթացքին:

Աղբիւրը Հայ Կաթողիկէ Պատրիարքարան եւ Գանձասար