հայր Գէորգ Ծ. վրդ. Նորատունկեան ընտրուեցաւ Զմմառու Պատրիարքական Կղերի Միաբանութեան Փոխանորդ

ՀԱՂՈՐԴԱԳՐՈՒԹԻՒՆ

Զմմառու Պատրիարքական Կղերի Միաբանութեան 2023-ի ընդհանուր ժողովը գումարուեցաւ 15-էն 19 Օգոստոսին` նախագահութեամբ Ամենապատիւ եւ Գերերջանիկ Տ. Տ. Ռաֆայէլ Պետրոս ԻԱ.ի` Կաթողիկոս Պատրիարք Տանն Կիլիկիոյ կաթողիկէ հայոց եւ ընդհանուր մեծաւոր Զմմառու պատրիարքական միաբանութեան, մասնակցութեամբ 25 միաբան եպիսկոպոս եւ վարդապետ հայրերու:

Միաբանութեան ընդհանուր ժողովը սկսաւ Սուրբ եւ անմահ Պատարագով: Ապա միաբան հայրերը ժողովասրահ ուղղուեցան եւ «Նոյն եւ նման» շարականով սկիզբ առաւ Միաբանական ընդհանուր ժողովը: Միաբան Հայրերը ունկնդրեցին նախորդ վարչութեան տեղեկագիրները, ինչպէս նաեւ քննարկեցին Զմմառու Կղերի Միաբանութեան կանոնագիրքի նոր բանաձեւը: Այնուհետեւ ընդհանուր ժողովը իբրեւ Պատրիարքական Փոխանորդ ընտրեց հայր Գէորգ Ծ. վրդ. Նորատունկեանը:

Միաբանական ընդհանուր Ժողովը ընտրեց նաեւ 4 վարչականներ՝

Գերապատիւ Հայր Պերճ Սապէ,

Գերապատիւ Հայր Գէորգ Պահէ,

Գերապատիւ Հայր Գրիգոր Պատիշահ

եւ Գերապատիւ Հայր Պետրոս Մարաշլեան

Շաբաթ, 19 Օգոստոսի կէսօրուայ ժամը 12:30-ին, Ամենապատիւ Հոգեւոր Տէրը հովուական գաւազան, մատանի, լանջախաչ եւ եպիսկոպոսական թագ շնորհեց Գերպծ. Գէորգ Ծ. վրդ. Նորատունկեանին` թագադիր ծայրագոյն վարդապետի տիտղոսով:

Միաբանութեան պատրիարքական փոխանորդ եւ վանքի մեծաւոր` գերպծ. Գէորգ թ. ծ. վրդ. Նորատունկեան, մասնակցութեամբ միաբանութեան նոր վարչութեան անդամներուն, հանդիսաւոր սուրբ պատարագ պիտի մատուցանէ Զմմառու վանքին եկեղեցւոյ մէջ կիրակի, 20 Օգոստոս 2023-ին, առաւօտեան ժամը 10:30-ին, որմէ ետք պատրիարքական փոխանորդը եւ վարչական հայրերը շնորհաւորութիւնները պիտի ընդունին վանքի դահլիճին մէջ, մինչեւ կէսօրուայ ժամը 13:00, իսկ կէսօրէ ետք` ժամը 16:00- 19:00:

ԴԻՒԱՆ ԶՄՄԱՌՈՒ ՊԱՏՐԻԱՐՔԱԿԱՆ

ՄԻԱԲԱՆՈՒԹԵԱՆ

Զմմառ, 19 օգոստոս 2023