Ռաֆայէլ Պետրոս ԻԱ-ի հովուապետական այցը Յունաստան
Ռոպէր Աթթարեան - Վատիկան
Ուրբաթ 28 Ապրիլ 2023-ին Տանն Կիլիկիոյ Կաթողիկէ հայոց կաթողիկոս պատրիարք` Ամենապատիւ եւ գերերջանիկ Տ.Տ. Ռաֆայէլ Պետրոս ԻԱ հովուապետական այցելութեամբ կը ժամանէ Յունաստանի մայրաքաղաք` Աթէնք, ուր պիտի մնայ մինչեւ վեց մայիս, հովանաւորելով տարբեր ձեռնարկներ, որոնք ծրագրուած են տօնախմբելու համար յոբելենական զոյգ առիթներ` «Առաջին Հարիւր Ամեակ», ըլլայ Երջանկայիշատակ Կիւրեղ Եպիսկոպոս Զոհրապեանի Յունաստան ժամանելուն, ըլլայ Յունաստանի Հայ կաթողիկէ Առաքելութիւնը եւ ընտանիքները Մանուկ Յիսուսի Սրբուհի Թերեզայի պաշտպանութեան նուիրելուն։
Լուրը կը տեղեկանանք Յունաստանի Հայ Կաթողիկէներու Առաքելական Կառավարիչ ` Գերյ. Յովսէփ Ծ. Վ. Պեզեզեանէն, որուն հովանիով կազմակերպուած է հայրապետական այցելութիւնը եւ յոբելենական տօնակատարութիւնները։
Միութենական աղօթք եւ յուշակոթողի օրհնութիւն
Նախատեսուած ձեռնարկներու շարքին են «Միութենական աղօթքը» զոր պիտի կատարուի Նէոս Քոզմոսի Սուրբ Գրիգոր Լուսաւորիչ եկեղեցւոյ մէջ, Ուրբաթ, 28 Ապրիլ 2023 երեկոյեան, հովանաւորութեամբ Ամենապատիւ Հոգեւոր Տիրոջ, որուն աւարտին եկեղեցւոյ «Խանցեան» պարտէզին մէջ տեղի կ՛ունենայ Ապրիլեան Նահատակներու յիշատակին նուիրուած յուշակոթողի օրհնութիւնը, ապաԱմենապատիւ Հոգեւոր Տիրոջ ի պատիւ սարքուած սիրոյ սեղան` «Քոյունեան» սրահէն ներս։
Հայրապետական Սուրբ Պատարագ
Կիրակի, 30 Ապրիլ 2023ի առաւօտեան ժամը 11,00ին, Ամենապատիւ Հոգեւոր Տէրը, Սուրբ Գրիգոր Լուսաւորիչ եկեղեցւոյ մէջ, կը նախագահէ Հայրապետական Ձայնաւոր Սուրբ Պատարագին։
Վարդարանի աղօթքը ու նուիրագործում
Իսկ երկուշաբթի 01 Մայիսի երեկոյեան, Քոքինիայի Մանուկ Յիսուսի Սրբուհի Թերեզայի եկեղեցւոյ մէջ, Ռաֆայէլ Պետրոս ԻԱ Կաթողիկոս Պատրիարքը, կը գլխաւորէ Սուրբ Վարդարանի աղօթքը, որուն առիթով նախատեսուած է յատուկ «աղօթք» մը, որով կը նորոգուի Յունաստանի առաքելութեան եւ հայ ընտանիքներուն նուիրումը` Մանուկ Յիսուսի Սրբուհի Թերեզայի բարեխօսութեան։
Յաւարտ արարողութեան, Հոգեւոր Տէրը պիտի կատարէ «Զոհրապեան» նոր սրահի օրհնութիւնը, ապա տեղի պիտի ունենայ հիւրասիրութիւն` ի պատիւ Կաթողիկոս Պատրիարքին։
Յոբելենական ձեռնարկ Լատին Եկեղեցւոյ ամփիթատրոնին մէջ
Ի շարս այլ ձեռնարկներու, Չորեքշաբթի 3 մայիսի երեկոյեան, հովանաւորութեամբ միշտ Տանն Կիլիկիոյ Կաթողիկէ Հայոց` Ռաֆայէլ Պետրոս ԻԱ-ին եւ Յունաստանի Հայ կաթողիկէներու առաջնորդ` Գերյ. Հայր Յովսէփ Ծ. Վ. Պէզեզեանին, Կաթողիկէ Լատին Եկեղեցւոյ «Ամփիթատրոն» մեծ սրահին մէջ, տեղի կ՛ունենայ Յոբելենական նշումը` Երջանկայիշատակ Կիւրեղ Եպս. Զոհրապեանի Յունաստան ժամանումին եւ Յունաստանի Հայ Կաթողիկէ առաքելութիւնը Մանուկ Յիսուսի Սրբուհի Թերեզայի պաշտպանութեան նուիրումի հարիւր ամեակին։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
