Հայ եկեղեցւոյ ծէսը և ծիսակարգը. Հ. Մովսէս Վրդ. Տօնանեանի շաբաթական հաղորդաշարը (ՂԶ)
ՂԶ. Հաղորդում
Այսօր մեր հաղորդումի ընթացքին՝ պիտի անդրադառնանք շարականներու խազագրութեան և զանոնք կրկին ընթեռնելու աշխատանքներուն:
Հայ Եկեղեցւոյ աւանդական շարականներու երաժշտութիւնը մինչեւ ԺԹ. դար սերունդէ սերունդ փոխանցուած է բանաւոր կերպով, միեւնոյն եղանակի տեղային բազմաթիւ տարբերակներ կամ երգուածքներ յառաջացնելով հայկական տարբեր գաղթօճախներու մէջ: Առ այս՝ ԺԹ. դարուն, հայկական խազերը կրկին ընթեռնելու բազմաթիւ փորձեր կատարուեցան, նախ՝ երաժշտագէտ Համբարձում Լիմոնճեանի (1768-1839) կողմէ Պոլսոյ մէջ, իսկ յետագային, Կոմիտաս Վարդապետի կողմէ: Պապա Համբարձումը եկեղեցական երգեցողութեան դասատու էր Պոլսոյ Ս. Գրիգոր Լուսաւորիչ Հայ Կաթողիկէ վարժարանին մէջ:
Տիւզեան մեծահարուստ գերդաստանը զայն կը պահէր իր հովանիին տակ, անոր ապահովելով նիւթական և կենցաղային պայմաններ: Տիւզեաններու պալատը ժամադրավայրն էր եւրոպացի և տեղացի արուեստագէտներու և երաժշտագէտներու, ուր Լիմոնճեան առիթ կ'ունենար շփուելու արեւմտեան երաժշտութեան հետ: Պապա Համբարձում մօտէն ծանօթ ըլլալով յոյն եկեղեցական երգեցողութեան, իր այս ծանօթութիւնը կ'օգտագործէ հայկական հին խազերուն նոր նշանակութիւն տալու՝ զանոնք յունական խազանշաններուն յարմարցնելով: Ան առաջին հերթին՝ յունականին նման՝ 14 խազեր կ'ընտրէ ու այդ նոր խազանիշերով՝ գրի կ'առնէ Պոլսոյ մէջ երգուող հայ հոգեւոր երգերու և շարականներու եղանակներուն մեծ մասը:
Ի դէպ՝ Լիմոնճեանի յաջորդները յետագային այդ 14 խազերը եօթնի կը վերածեն, եւրոպական խազերու նմանութեամբ: Այս եօթը խազերը կը կոչուին. Փուշ, էկորճ, վերնախաղ, բէկորճ, խոսրովային, ներքնախաղ, պարոյկ, որոնք ձեւականօրէն հայկական խազերն էին, պահելով հանդերձ եւրոպական տօ-րէ-մի-ֆա-սոլ-լա-սի ձայնանիշներու եղանակը: Մեծ Եղեռնէն ետք, Պապա Համբարձումի այս խազերը մոռացութեան մատնուեցան՝ եւրոպական խազերուն որդեգրումով: Կոմիտաս վարդապետ (1869-1935), քսան տարի ուսումնասիրած է Հայ եկեղեցւոյ խազերը (neumes), աչքի առջեւ ունենալով Թ. դարէն մինչեւ ԺԹ. դարու Հայկական ձեռագիրները, որոնք երաժշտական թանկագին գաղտնիքներ կը պարունակէին և մթին կէտեր կը բացայայտէին: Խորքին մէջ, Կոմիտասի նպատակն էր վերծանել Ժ. դարու երկրորդ կէսէն ի վեր մոռացութեան ենթարկուած հայկական խազերը և այսպէս մեր հին եղանակները երեւան հանել:
Արդարեւ, ան հին ձեռագիրներէն եօթանասունէն աւելի խազեր կը յայտանաբերէ, այսինքն՝ մէկ երրորդը հասկնալի էր իրեն համար, անոնց արժէքը մասամբ պարզելով: Արդարեւ, Կոմիտասի համաձայն՝ Հայ Եկեղեցւոյ խազերը կարելի է բաժնել երեք դասի. առոգանութեան նշաններ, կէտադրութեան նշաններ եւ երգեցողութեան նշաններ: Ան հետեւեալ հարցադրումը կատարած է. «Մեր Հայկական խազերու (ձայնանիշներու) թիւը 50-ի կը հասնի, այսքան նոթա չկայ երգեցողութեան մէջ, որ միայն եօթը ձայն գիտէ: Ինչու՞ Հայերը այսքան խազ հնարած են: Ես կը կարծեմ, որ այս 50 խազերու մեծագոյն մասը կը ներկայացնէ տո, րէ, մի, ֆա քառեակը միասին կամ մէկ ուրիշ խազ կը նշանակէ ֆա, մի, րէ, տօ քառեակը»:
Արդ, խազերու բազմազանութիւնը ցոյց կու տայ հայ եկեղեցւոյ երաժշտութեան հարստութիւնը, ինչ որ կը վկայեն մեր տօնական օրերու շարականներու հանդիսաւորութիւնը: Կոմիտաս կը սպասէր Թոխադէն ստանալու շատ կարեւոր ձեռագիր խազգիրք մը, որուն միջոցաւ յոյս ունէր հին խազերու ամբողջ բանալին իր աչքին առջեւ ունենալ: Սակայն դժբախտաբար Մեծ Եղեռնը կասեցուց վարդապետի ծրագրին իրականացումը:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ