«Մարիամ եւ արմատական ֆէմինիզմը». Հայր Գէորգ Եպիսկոպոս Ասատուրեանի շաբաթական խորհրդածութիւնը
Վարդարան աղօթելը, ինչպէս նաեւ սէր ու բարեպաշտութիւն ցուցաբերելը ամենասրբուհի Մարիամին, քրիստոնեայ հաւատացեալին ամենազօր պաշտպանութիւնն է ընդդէմ ներկայ աշխարհի ցնորին երեւոյթներու: Ինչպէս նախորդ պատգամովս փոխանցած էի, թէ Աստուածամայրը հոգեւոր պատերազմի իրականութեան հետ առնչուող ամենահզօր ռազմուհին է: Վերոյիշեալ երեւոյթներէն են արմատական ֆէմինիզմը (féminisme radical): Նախորդ դարասկիզբէն ի վեր մտածելակերպ մը յայտնուած է իգական սեռին մօտ ( ինչպէս նաեւ այր մարդոց), թէ կինմարդը տղամարդուն հաւասար է: Սխալ չհասկցուելու համար բացայայտեմ, որ այո՝ հաւասար է, բայց նոյնը է: Սոյն մտածելակերպի տէրերը հաւասարութեան անունին ներքեւ միանմանութիւն կը քարոզեն: Այսինքն՝ կինը միանման է տղամարդուն. կրնայ անոր նման հագնիլ, վարուիլ, մարզական բնագաւառի մէջ կրնայ նոյն խաղերու մասնակցիլ եւ ամենավտանգաւորը՝ ընտանիքը անտեսել ի սէր ասպարէզի: Կինմարդը պէտք չէ իր կեանք «աւերէ» ընտանիքը խնամելով. այլ պէտք իր աշխատանքային կեանքը գերազանց նկատէ քան իր մայրական առաքելութիւնը:
Այս արտասովոր երեւոյթին ընդդէմ ունինք Ս. Կոյսը: Ան երկնքի եւ երկրի թագուհին է. եկեղեցւոյ հայրերու եւ սուրբ ճգնաւորներու ու վարդապետներու բարեպաշտութեան առարկան է: Բոլորը կը խոնարհին իրէն առջեւ եւ անոր բարեխօսութիւնն ու աջակցութիւնը կը խնդրեն: Ահաւասիկ կին մը՝ մարդկային ցեղէն, ընտրուած Ամենակալին կողմէ ըլլալու Աստուածամայր (Théotokos)՝ Աստուած կրող: Անոր համար Ս. Կոյսի նկարները ընդհանրապէս պատկերացուած են Յիսուս մանուկը գրկած: Այս բոլորը, որովհետեւ Մարիամ հաճեցաւ մայր ըլլալ, եւ Ս. Ընտանիքը խնամել: Անգլիացի քրիստոնեայ ջատագով՝ Սի Էս Լուիս կը գրէ. Մայր ըլլալը ամենավսեմ պաշտօնն է: Բոլոր միւս պաշտօնները գոյ են սպասաւորելու այս ազնիւ գործին:
Ամերիկացի քարոզիչ՝ Ատրեան Ռոճըրզ կը նշէ՝ Կինմարդ ամբողջովին գերակայ է տղամարդուն՝ կին ըլլալով:
Մարիամ իր մայրական օրինակով կու գայ ֆէմինիզմ շարժումին վերոյիշեալ արտասովոր ըմբռնումը խորտակելու: Ան անգամ մը եւս մեզի կը յիշեցնէ, որ Աստուծոյ ստեղծագործութիւնը պէտք չէ եղծել: Մարիամ ինք իգական սեռին պատկանելով, կը պատերազմի ընդդէմ նման գաղափարախօսութիւններու, պաշտպանելու համար ընտանիքը, որու դէմ մարդկութեան թշնամին այնքան կատաղի պատերազմ կը մղէ:
Հետեւաբար միշտ աղօթենք վարդարանը, որպէսզի Ս. Կոյսը մեր կողքին պատերազմի այս պատերազմը: Եւ մենք քաջ գիտենք, որ մեր Տէր Յիսուս Քրիստոս, ընդառաջելով իր մօր բարեխօսութեան, պիտի տայ մեզի յաղթանակը աշխարիկ որեւէ այլասեռութիւններու դէմ:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
