Աստուածամօր նուիրուած ամիսը Սուրբ Պետրոս տաճարին մէջ

Մարիամ Երեմեան – Վատիկան

Մայիս ամիսը Աստուածամօրը նուիրուած ամիս է: Այս առիթով Հռոմի Թեմը և Սուրբ Պետրոս պազիլիքայի ժողովրդապետութիւնը կազմակերպած են շարք մը արարողութիւններ՝ տօնելու համար Սուրբ Կոյս Մարիամը, Տաճարին մէջ մեծարուած «Mater Ecclesiae» սրբապատկերի յատուկ կոչումով։

Ամբողջ մայիս ամսուայ ընթացքին ժամանակացոյցը կը նախատեսէ.

- Չորեքշաբթի օրերուն ժամը 16ին, Սուրբ Պետրոս տաճարի նախագաւիթին մէջ շարք մը աղօթքներ՝ նուիրուած Աստուածամօր, որոնց աւարտին ժամը՝ 17.00-ին կը մատուցուի Սուրբ Պատարագ։

- Շաբաթ օրերուն, երեկոյեան ժամը 21.00-էն մինչև երեկոյեան 22.00-ը, Վատիկանի Պետութեան երբեմնի տեղապահ կարդինալ Անճելօ Քոմասթրիի մասնակցութեամբ վառուած ջահերով երթ Սուրբ Պետրոս հրապարակին վրայ՝ «Mater Ecclesiae» սրբապատկերի եւ Սուրբ Վարդարանի աղօթքի ուղեկցութեամբ:

Յայտնենք թէ «Mater Ecclesiae» խճանկարը պատկերուած է Սուրբ Պետրոս տաճարի արտաքին սիւնի մը վրայ: Սուրբ Յովհաննէս Պօղոս Բ-ն 1981 թուականին՝ մահափորձէն քանի մը ամիս ետք, օրհնած է «Mater Ecclesiae»ի պատկերը՝ խնդրելով, որ «բոլոր անոնք, որոնք կու գան Սուրբ Պետրոս հրապարակ, իրենց հայեացքը բարձրացնեն դէպի Անոր, այնտեղ  որդիական վստահութեան զգացումներով ուղղելու համար`անձնական ողջոյնը և աղօթքը»:

Ֆրանչիսկոս Սրբազան Քահանայապետի կողմէ մի քանի ամիս առաջ Սիւնհոդոսական ուղիի բացումը, «Mater Ecclesiae»-ի մէջ կը գտնէ Եկեղեցւոյ համար այն ներշնչումը, որ Սուրբ Հոգիի միջոցաւ կը թարմացնէ առաքեալներուն միսիոներական խանդավառութիւնը և կը ներկայացուի որպէս Քրիստոսի ետեւէն միասին քալելու օրինակ, այնպէս ինչպէս նոյնինքն Տիրամայրը այս մէկը ցոյց կու տայ  Աւետարանին մէջ ըսելով. «ըրէք, այն ինչ որ ձեզի կը հրամայէ»։