Պատուաստանիւթ ապահովել բոլորի համար. Եւրոպական Միութեան Եպիսկոպոսների համաժողովների յանձնախումբի կոչը ԵՄ-ին:

Վատիկան Նիուզ

Եւրոպական Միութեան Եպիսկոպոսների համաժողովների յանձնախումբը (ԵՄԵՀՅ) եւ Քարիթաս Եւրոպան համատեղ յայտարարութեան մէջ եւրոպական հաստատութիւններին խնդրում են ապահովել պատուաստանիւթի հասանելիութիւնը բոլորի, մասնաւորապէս՝ առաւել աղքատ երկրների բնակչութեան համար: Սա համարւում է «անհրաժեշտ համաշխարհային բարոյական պարտականութիւն»: Եւրոպական Միութեան Եպիսկոպոսների համաժողովների յանձնախումբը եւ Քարիթաս Եւրոպան բարձր են գնահատում Եւրոպական Միութեան անդամ երկրների տնտեսութիւնների արագ շրջանառութիւնը՝ ի աջակցութիւն պատուաստանիւթերի մշակման համար իրականացուող գիտական հետազօտութիւնների: Այսուհետեւ, «համաշխարհային հանրութեանը կը տրամադրուեն համաճարակի դէմ պայքարի արդիւնաւէտ միջոցներ», սակայն, այս ամէնին զուգընթաց, ի յայտ են գալիս մի շարք կարեւոր հարցեր. «Ինչպէ՞ս են ընթացել բանակցութիւնները ԵՄ հաստատութիւնների եւ դեղաբանական կազմակերպութիւնների միջեւ եւ ինչպէ՞ս են ձեռք բերուել համաձայնութիւնները» (…) Ըստ առաջնահերթութեան՝ ո՞վքեր պատուաստանիւթ կը ստանան: Ինչպէ՞ս աւելացնել արտադրական կարողութիւնը եւ արտադրութեան միջոցները, որոնք ոչ միշտ է, որ տեղակայուած են Եւրոպական Միութեան սահմանների ներսում: Ինչո՞ւ պատշաճ կերպով պատրաստուած չէին պետական հաստատութիւնները»:

Կաթողիկէ երկու հաստատութիւններն ընդգծում են, որ այս գործընթացում Եւրոպական Միութեան դերը վճռորոշ է: Նկատի առնելով «անհրաժեշտ բարոյական պարտաւորութիւնը»՝ պատուաստանիւթերը պէտք է հասանելի եւ մատչելի լինեն բոլորի համար՝ համաձայն համերաշխութեան, սոցիալական արդարութեան եւ ներառականութեան սկզբունքների, որոնց վրայ հիմնուած է Եւրոպական Միութիւնը:

Այսպիսով, սա կոչ է ԵՄ-ին՝ արագօրէն որոշում կայացնելու եւ պատուաստանիւթերի հասանելիութիւնն ապահովելու համար մանրակրկիտ ռազմավարութիւն մշակելու, ինչպէս նաեւ զանգուածային պատուաստումներ իրականացնելու «ոչ միայն Եւրոպայի անվտանգութեան եւ պաշտպանութեան, այլեւ՝ այն մարդկանց համար, ովքեր ապրում են առաւել աղքատ երկրներում»: Այս ամէնը նկատի առնելով՝ Եւրոպական Միութեան Եպիսկոպոսների համաժողովների յանձնախումբը եւ Քարիթաս Եւրոպան հաւանութիւն են տալիս Քովաքս համաշխարհային համակարգի ներդրմանը, որի նպատակն է Քովիտի դէմ պատուաստանիւթերի հասանելիութիւնն ապահովել նաեւ տնտեսապէս խոցելի տարածաշրջաններում:

Այսուհետեւ, հասանելի են համաճարակի դէմ պայքարի բազմաթիւ միջոցներ, ուստի, «անհրաժեշտ կազմակերպական եւ նիւթատեխնիկական միջոցների առկայութեան դէպքում հնարաւոր կլինի զանգուածային պատուաստումներ իրականացնել», իսկ Հէրա ինկուբացիոն նոր համակարգի շնորհիւ «պատուաստանիւթերի արտադրութեան գործընթացում հնարաւոր կլինի բացայայտել եւ վերացնել բոլոր խոչընդոտները եւ կարգաւորել արտադրութիւնը, որպէսզի անմիջապէս կասեցուի վարակի նոր տեսակի առաջացումը»:

Պատմական այս ժամանակաշրջանում, եւրոպական հաստատութիւնների պարտքն է «մեղմացնել ճգնաժամի աղէտալի հետեւանքները, որոնցով են պայմանաւորուած մարդկային տագնապները, աճող սոցիալական անհաւասարութիւնը եւ աշխարհի բնակչութեան շրջանում աղքատութեան թուի բարձրացումը: Միեւնոյն ժամանակ, պէտք է աջակցեն Եւրոպական Միութեան անդամ երկրներին՝ տեղեկատուական արշաւների իրականացման եւ հանրութեան իրազեկման գործում, ինչը կը նպաստի պատուաստումների նկատմամբ ունեցած վախերի յաղթահարմանը եւ ապատեղեկատուութեան չէզոքացմանը»:

Թարգմանեց՝ Հրանուշ Սարգսեանը