Ամենայն Հայոց Կաթողիկոսի կոչը

Սիրելի հաւատաւոր ժողովուրդ,

Մայր Աթոռ Սուրբ Էջմիածնի աստուածային օրհնութիւնն ենք բերում ձեզ եւ Հայրապետական մեր սէրն ու աղօթքները:

Մեր հայրենիքի համար վճռական օրեր են։ Կենաց ու մահու կռիւ ենք մղում յանուն Արցախի մեր ժողովրդի ազատ ու անկախ կեանքի իրաւունքի։ Ադրբեջանը, անտեսելով հրադադարի պայմանաւորուածութիւնը, շարունակում է ռազմական գործողութիւնները Արցախի Հանրապետութեան դէմ՝ հրետակոծելով նաեւ խաղաղ բնակավայրերն ու բնակչութեանը, մեր յուշարձաններն ու սրբավայրերը, Շուշիի Ղազանչեցոց սուրբ Ամենափրկիչ եկեղեցին։ Թիրախաւորուել են նաեւ Հայաստանի Հանրապետութեան սահմանամերձ բնակավայրերը։ Ադրբեջանի այս ընթացքը ի ցոյց է դնում բանակցութիւնները ձախողելու, Արցախի ժողովրդին հայրենի հողից վտարելու եւ բնաջնջելու նրա հայատեաց քաղաքականութիւնը։ Արցախի համար չկայ եւ չի կարող լինել անվտանգութեան երաշխիք Ադրբեջանի կազմում։ Պատերազմը մեր ժողովրդի ընտրութիւնը չէ: Մեզ պարտադրուած է ինքնապաշտպանութիւնը, որպէս բռնութեան ու բիրտ ուժի դէմ մեր կեանքի, ազատութեան եւ արժանապատուութեան պահպանման միակ միջոց:

Մենք դիմում ենք մարդկային կեանքը, խաղաղութիւնն ու արդարութիւնը արժեւորող բոլոր պետութիւններին, մասնաւորապէս ԵԱՀԿ Մինսկի խմբի համանախագահող երկրներին՝ առաւել վճռական քայլեր ձեռնարկելու կանխելու համար Թուրքիայի եւ վարձկան ահաբեկիչների անմիջական ներգրաւմամբ Ադրբեջանի կողմից իրագործուող վայրագութիւններն ու ցեղասպան գործողութիւնները, հարկադրելու դադարեցնել պատերազմը եւ հիմնախնդրի կարգաւորմանը հետամուտ լինել բանակցութիւնների ճանապարհով։ Արցախի ժողովրդի անվտանգ կեանքը, Արցախում կայուն խաղաղութեան հաստատումը կենսական ու հրամայական է՝ կանխելու աւերածութիւններն ու հումանիտար աղէտը տարածաշրջանում։

Մեր կոչն ենք ուղղում հայրենաբնակ եւ աշխարհասփիւռ մեր ժողովրդին. սիրելիներ, առաւել քան երբեւէ հայրենիքը կարիքն ունի մեզանից իւրաքանչիւրի ամբողջանուէր յանձնառութեան, համայն հայութեան համախմբման եւ յաղթական վճռականութեան՝ Արցախը պաշտպանելու, մեր ժողովրդի նկատմամբ արդարութիւն հաստատելու սրբազան այս գոյապայքարում։ Լինենք միասնական եւ աննկուն, շարունակենք Արցախին ցուցաբերուող զօրակցութիւնը, Արցախի Հանրապետութեան միջազգային ճանաչմանն ուղղուած ջանքերը, որպէսզի մեր հերոս նախնիների ոգով ներշնչուած՝ փառապանծ յաղթանակով վերականգնենք խաղաղութիւնը հայրենեաց սահմաններում եւ ապահովենք Հայաստան եւ Արցախ մեր հայրենի երկրի անվտանգ ու ստեղծագործ կեանքը։

Սիրելի զինուորներ եւ սպաներ Հայոց փառապանծ բանակի, առանձնակի գնահատանքով եւ երախտագէտ սրտով բերում ենք ձեզ Հայրապետական մեր օրհնութիւնը։ Ամէն օր ծանր մարտերում դուք սխրանքներ էք գործում` պաշտպանելով մեր հայրենիքն ու ազատ ապրելու իրաւունքը մեր ժողովրդի։ Ամէն ժողովուրդ պիտի հպարտանար ձեզ պէս նուիրեալ, արժանաւոր զաւակներով: Մեր ժողովրդի պարծանքն էք դուք, մեր պետականութեան, ազատ Հայաստանի, ազատ Արցախի գոյութեան եւ մեր արդար ձգտումների երաշխաւորը: Այս պայքարի ընթացքում նաեւ կորցրեցիք զինակից ընկերներ, ովքեր ընկան հերոսի մահով եւ ժառանգեցին նահատակութեան անթառամ պսակը։ Մեր նորօրեայ նահատակների լոյս յիշատակի առջեւ թող հաստատ լինի ձեր ուխտը՝ ազգասիրութեան յաղթական ոգին աննկուն պահելու եւ հայրենին պաշտպանելու։ Ձեր անձնուիրումի ու ծառայութեան օրինակով ոտքի է կանգնել համայն մեր ժողովուրդը ի սփիւռս աշխարհի եւ իր ձայնն է բարձրացնում յանուն Արցախի իրաւունքների եւ յաղթանակի։ Մենք հաւատում ենք, որ «Տէրն իր ժողովրդին զօրութիւն պիտի տայ, իր ժողովրդին պիտի օրհնի խաղաղութիւն պարգեւելով» (Սաղմ. ԻԸ 11)։ Եւ այդ յաղթական հաւատքով հայցում ենք Բարձրեալից, որ անփորձանք պահի ու պահպանի ձեզ, սիրելի զինուորներ եւ սպաներ, աշխարհազօրայիններ եւ կամաւորականներ, զինավառի ձեզ իր հոգեւոր սպառազինութեամբ եւ զօրացնի ձեր բազկի ուժը՝ հաստատելու յարատեւ խաղաղութիւնը մեր հայրենիքում եւ մեր ժողովրդի կեանքում։

Աղօթում ենք ձեզ համար։ Աստուած օգնական եւ ապաւէն ձեզ, Աստուած օգնական եւ ապաւէն Հայաստան եւ Արցախ հայրենի մեր երկրին եւ մեր ժողովրդին։ Ամէն։