Որոնել

Vatican News
Սուրբ Յովհաննէս Պօղոս Բ Սուրբ Յովհաննէս Պօղոս Բ 

Լեհաստանի Եկեղեցին կը պատրաստուի տօնախմբել Սուրբ Յովհաննէս Պօղոս Բ ծննդեան 100 ամեակը։

Տօնախմբութիւնները սկիզբ կ՛առնեն շաբաթ 16 մայիսին Քրաքովի Արքեպիսկոպոսութեան մատրան մէջ ու կը հեռարձակուին ուղիղ եթերով։
Ունկնդրէ լուրը

Ռոպէր Աթթարեան - Վատիկան

Յառաջիկայ 18 մայիսին կը յիշատակուի Սուրբ Յովհաննէս Պօղոս Բ ծննդեան 100 ամեակը, յոբելեան մը՝ որ հակառակ Քորոնա ժահրի բերումով որդեգրուած սահմանափակումներուն, Լեհաստանի Եկեղեցին կը պատրաստուի  յիշատակել մեծ շուքով եւ որուն առթիւ կազմակերպած է տարբեր ձեռնարկներ եւ արարողութիւններ, որոնք սկիզբ կ՛առնեն շաբաթ 16 մայիսին, Քրաքովի Արքեպիսկոպոսութեան մատրան մէջ ու կը  հեռարձակուին ուղիղ եթերով։

Շաբաթ 16 մայիսի երեկոյեան 5-ին, Քրաքովի Արքեպիսկոպոսութեան մատրան մէջ, վայրը ուր Սուրբ Յովհաննէս Պօղոս Բ ընդունեցաւ Քահանայական ձեռնադրութիւնը, նախատեսուած է Սուրբ Վարդարանի միջազգային աղօթքը, որուն պիտի միանան Իտալիոյ՝ Պերկամօ, Միացեալ Նահանգներու՝ Նիու Եորք, Պրազիլի Պելօ Հորիզոնթէ քաղաքները, որպէս դիտաւորութիւն ունենալով համաճարակին աւարտը։

Կիրակի՝ 17 Մայիսին, տօնախմբութիւնները կը փոխադրուին Սուրբ Յովհաննէս Պօղոս Բ ծննդավայր՝ Վատովիչէ, ուր առաւօտեան 10.30-ին Գերապայծառ Մարէք Ետրաժեվսքին կը նախագահէ Սուրբ Կոյս Մարիամի Տաճար ընծայման Սուրբ Պատարագը, մինչ ժամը 13-ին Սուրբ Յովհաննէս Պօղոս Բ անուան Ընտանեկան Տունին մէջ նախատեսուած է «Ծնած եմ Վատովիչէ  – Քարոլ Վոյթիլա» խորագիրով համերգ մը։ Երկու ձեռնարկներն ալ կը սփռուին  ուղիղ եթերով «TVP1» հեռուստակայանէն եւ երեկոյեան՝ նոյն կայանէն, կը  սփռուի նաեւ Երջանկայիշատակ Քահանայապետին երբեմնի քարտուղար՝ Կարդինալ Սթանիզլաւ Ճիվիչին լեհ ժողովուրդին ուղղած յատուկ պատգամը։

Մինչ երկուշաբթի 18 մայիսին, յոբելեանին օրը, Քրաքովի Սուրբ Յովհաննէս Պօղոս Բ Սրբավայրին մէջ, ուղիղ եթերի սփռումով տեղի կ՛ունենայ Գերապայծառ Մարեք Ետրաժեվսքիի նախագահութեամբ սուրբ պատարագը, որուն կը յաջորդէ «Անմիջապէս Սուրբ – մեր ժամանակներուն մարգարէ» խորագիրով համերգը։

13/05/2020, 11:12