Բուն Բարեկենդան եւ Օր Մոխրոց Փանիկում
23 փետրուարի, 2020 թուական. Բուն Բարեկենդան, Ա. Կիրակի Քառասնորդաց, Մուտն Ադամայ ի դրախտն: Առաւօտեան ժամը 10:00-ին Փանիկի Սուրբ Աստուածածին Հայ Կաթողիկէ Եկեղեցւոյ մէջ մատուցուեց Սուրբ եւ Անմահ Պատարագ ձեռամբ՝ Գերյ. Հ. Գառնիկ Ծ. Վրդ. Յովսէփեանի:
Սուրբ գրային ընթերցումներից յետոյ՝ քարոզի ժամանակ, Հայր Սուրբը անդրադարձաւ Բուն Բարեկենդանին, որը խորհրդանշում է Եդեմական պարտէզում Ադամի եւ Եւայի ապրած երանութեան օրերը եւ յիշատակում մարդկային առաջին երջանկութիւնը: Բարեկենդանն առաքինութիւնների արտայայտութեան շրջան է եւ դրախտային կեանքի օրինակ: Բարեկենդան, այսինքն՝ բարի կենդանութիւն, նշանակում է բարի կեանք, երջանկութիւն: Մեզանից իւրաքանչիւրն այս կեանքում երջանկութիւն է փնտռում եւ երջանկութեան իր ընկալումն ունի: Շատ յաճախ մենք այն փնտռում ենք անցողիկ վայելքների կամ փառքի մէջ, մինչդեռ, որպէս քրիստոնեայ պէտք է մեր երջանկութիւնը որոնենք եւ գտնենք Քրիստոսի անձի մէջ:
Բուն Բարեկենդանի օրը փակւում է Եկեղեցւոյ վարագոյրը՝ խորհրդանշելով անհնազանդութեան պատճառով Ադամի արտաքսումը Դրախտից, որն անուղղակի կերպով վերաբերում է բոլոր նրանց, ովքեր ապրում են Եկեղեցուց դուրս՝ հեռու Աստուծոյ կենարար խօսքից եւ փրկարար սիրուց:
Մեծ պահքը շրջան է զղջումի եւ ապաշխարութեան… Քառասնորդաց այս շրջանում Եկեղեցւոյ պատգամն է իւրաքանչիւր քրիստոնեայ հաւատացեալի, նախ եւ առաջ, քննել սեփական անձը, ապրումները, ներքին ձգտումներն ու յոյզերը: Եկեղեցին յորդորում է հրաժարուել կենդանական ծագում ունեցող կերակուրներից եւ սնուել բացառապէս բուսական սնունդով, սակայն, պահքի խորհուրդը սրանով չի սահմանափակւում: Մենք բոլորս պէտք է գիտակցենք Աստուծոյ խօսքով սնուելու կարեւորութիւնը մեր կեանքում, կարողանանք հրաժարուել մեր մոլի սովորութիւններից, ստախօսութիւնից, շատախօսութիւնից եւ ամէն տեսակ մեղքից, որ հոգու ախտ են համարւում:
Այնուհետեւ, Գերյ. Հ. Գառնիկն ընդգծեց պահեցողութեան համար երեք կարեւոր պայմանները. աղօթք, ծոմապահութիւն եւ ողորմութեան գործեր:
Իւրաքանչիւր քրիստոնեայի համար Մեծ պահքի այս շրջանը իւրօրինակ ճամբորդութիւն է, որի ընթացքում մեզ որպէս ուղեկից պէտք է ընտրենք Քրիստոսին՝ հրաժարուելով մեր անձից եւ քայլելով Նրա Խաչի ետեւից:
Մեծ պահքի շրջանի ամէն կիրակի ունի իր խորհուրդը: Սա կարծես ճանապարհ լինի, որն անցնում է Եդեմական պարտէզից մինչեւ Գողգոթա՝ ադամական մեղքից մինչեւ մարդկութեան փրկագործութիւն:
Պահքով կամ ծոմապահութեամբ պէտք է սնուցենք մեր հոգին, ուստի, թող որ այս շրջանն ուղեկցուի աղօթքով եւ աւետարանական ընթերցումներով, քանզի զղջումը, աղօթքն ու ապաշխարանքը հիմնական պայմաններն են՝ արժանանալու Աստուծոյ օրհնութեանն ու ողորմածութեանը: Անօգուտ է մարմինը նուազեցնել պահքով, եթէ հոգին զերծ չէ մեղքից: Պահեցողութիւնը ներքին հոգեվիճակ է եւ չը պէտք է ի ցոյց դրուի մարդկանց. «Երբ ծոմ պահէք, տրտմերես մի՛ եղէք կեղծաւորների նման, որոնք իրենց երեսները այլանդակում են, որպէսզի մարդկանց այնպէս երեւան, թէ ծոմ են պահում. ճշմարիտ եմ ասում ձեզ՝ այդ իսկ է նրանց վարձը: Այլ երբ դու ծոմ պահես, օծիր քո գլուխը եւ լուա երեսդ, որպէսզի չերեւաս մարդկանց որպէս ծոմ պահող, այլ քո Հօրը՝ գաղտնաբար. եւ քո Հայրը, որ տեսնում է, ինչ որ ծածուկ է, կհատուցի քեզ» (Մատթ. 6:16-18):
Պատարագի աւարտին տեղի ունեցաւ Մոխիրի օրհնութեան կարգ, ապա՝ Հայր Սուրբը հաւատացեալների գլուխներին ցանելով մոխիրը ասաց. «Յիշեա, ո՛վ մարդ, զի հող էիր, եւ ի հող դարձցիս»:
Առ ի գիտութիւն. մոխիրը պատրաստուած է ուռենու, ձիթենու կամ արմաւենու ճիւղերից, որոնք օրհնուել էին նախորդ տարուայ ծաղկազարդի ժամանակ:
Սիրելի՛ հաւատացեալներ, պահքի եւ ծոմապահութեան այս շրջանում հայցում ենք Աստուծոյ լիառատ շնորհները եւ բոլորիդ մաղթում հաւատարիմ մնալ պահեցողութեան եւ ծոմապահութեան խորհուրդին:
Գերյ. Հ. Գառնիկ Ծ. Վրդ. Յովսէփեան
Փանիկի Սուրբ Աստուածածին Եկեղեցւոյ Ժողովրդապետ,
Հայաստանի Երիտասարդաց խմբի նախագահ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ