Ղպտի օրթոտոքսներու Սամալութ թեմին մէջ «Լիպիայի նահատակներուն» նուիրուած արարողութիւններ։

Ռոպէր Աթթարեան - Վատիկան

«Լիպիայի ղպտի նահատակներուն» 5-րդ տարելիցին առթիւ Եգիպտոսի Ղպտի օրթոտոքսներու Սամալութ թեմին մէջ կազմակերպուած են անոնց նուիրուած յիշատակութեան զանազան արարողութիւններ։

21 քրիստոնեայ այդ նահատակները որոնք 2015-ին վայրագ օրէն սպաննուեցան այդպէս կոչեալ Իսլամական Պետութիւն համակիրներուն կողմէ, Ղպտի Օրթոտոքս պատրիարք Թաուարտոս Բ տնօրինութեամբ ներառուած էին Ղպտի Եկեղեցւոյ Յայսմաւուրքի մէջ, որպէս յիշատակութեան օր սահմանելով 15 փետրուարը։  

Անոնց նահատակութեան 5-րդ տարելիցին յիշատակութեան արարողութիւնները որոնք սկիզբ առած էին անցեալ մէկ փետրուարին, պիտի աւարտին 16 փետրուարին, 2018-ին կառուցուած ու անոնց անուան նուիրուած Եկեղեցւոյ մէջ, որուն կողքին է նաեւ «Լիպիոյ Ղպտի մարտիրոսներու»անուամբ  թանգարանը, ուր 15 փետրուարին  բացումը կը կատարուի անոնց պատմութիւնը ներկայացնող  վաւերագրական նիւթերով նոր մասնաճիւղին։