Գրիգոր Պետրոս Ի Կաթողիկոս Պատրիարքը ընդունեց Հայ համայնքի նոր նախարար Վարդինէ Օհանեան-Գէորգեանը:

Տանն Կիլիկիոյ կաթողիկէ հայոց Գրիգոր Պետրոս Ի. կաթողիկոս պատրիարքը չորեքշաբթի, 22 յունուար 2020-ին, ընդունեց   Լիբանանի նորակազմ կառավարութեան մէջ հայ համայնքի ներկայացուցիչ Վարդինէ Օհանեան-Գէորգեանը, որուն կ՛ուղեկցէր Հայկական երեսփոխանական պլոքի ներկայացուցիչ, երեսփոխան Յակոբ Բագրատունի: Հանդիպումը առիթ մը եղաւ ծանօթանալու նոր նախարարին. ամենապատիւ հոգեւոր տէրը տուաւ իր օրհնութիւնը:

Լիբանանի նորակազմ կառավարութենէն ներս, ամէնէն երիտասարդ նախարարն է Վարդինէ Օհանեան-Գէորգեանը: Ան ծնած է 1984-ին, յաճախած է Ազգային Եղիշէ Մանուկեան քոլեճ եւ ապա Ազգային Լ. եւ Ս. Յակոբեան քոլեճ: Աւարտած է Լիբանանեան համալսարանի ընկերային գիտութիւններու բաժանմունքը: Ունի մագիստրոսի աստիճան՝ ընկերային հոգեբանութեան մէջ: Նաեւ ունի «Ծրագիրներու կառավարման» վկայական՝ Հայկազեան համալսարանէն:

Ան, 2017-էն մինչեւ այսօր տնօրէն է «Զուարթնոց» յատուկ դաստիարակութեան կեդրոնի: 2013-էն 2017 եղած է նոյն կեդրոնի ընկերային ծառայողը: 2007-էն 2008 իբրեւ ընկերային ծառայող աշխատած է Լիբանանի Հայոց թեմի ազգային առաջնորդարանին մէջ: 2005-էն 2008 եղած է «Թռչնոց բոյն»-ի ընկերային ծառայողը: