IMG-20200120-WA0012aem.jpg

Կոչումների աղօթքի օր Փանիկում:

«Հունձը առատ է, իսկ մշակները՝ սակաւ: Արդ, աղաչեցէք հնձի Տիրոջը, որ մշակներ հանի իր հնձի համար» (Մատթ. 9:37-38):

«Վեր կա՛ց, գնա՛ եւ մի՛ վախեցիր» բնաբանով հանդիպում տեղի ունեցաւ Փանիկի Սուրբ Աստուածածին Հայ Կաթողիկէ Եկեղեցում 2020 թուականի յունուարի 19-ին:Երկրորդ կիրակի զկնի Յայտնութեան Սուրբ եւ Անմահ Պատարագ մատուցուեց ձեռամբ Սրբոց Հրեշտակապետաց Միացեալ Հոգեւոր Ճեմարանի մեծաւոր Գերպ. Հայր Մաշտոց Վրդ. Զահթերեանի, առընթերակայութեամբ՝ փոխմեծաւոր Գերպ. Հայր Պետրոս Վրդ. Մարաշլեանի եւ Փանիկի Սուրբ Աստուածածին Հայ Կաթողիկէ Եկեղեցւոյ ժողովրդապետ Գերյ. Հայր Գառնիկ Ծ. Վրդ. Յովսէփեանի:

Ունկնդրէ լուրը

Սուրբ գրային ընթերցումներից յետոյ Գերյ. Հայր Գառնիկ Ծ. Վրդ. Յովսէփեանը ողջունեց ներկայ գտնուող գերապատիւ վարդապետներին, առաքինազարդ քոյրերին, Ճեմարանի սաներին եւ հաւատաւոր ժողովրդին: Գերյարգելի Հայր Գառնիկն իր խօսքը սկսեց Աւետարանից մէջբերումով. «Հ «Հունձը առատ է, իսկ մշակները՝ սակաւ: Արդ, աղաչեցէք հնձի Տիրոջը, որ մշակներ հանի իր հնձի համար»  (Մատթ. 9:37-38),- ապա, շարունակեց. «Այսօր, Փանիկ համայնքի համար առանձնայատուկ օր է, քանզի մեզ հետ են Երեւանի Սրբոց Հրեշտակապետաց Հայ Կաթողիկէ Միացեալ Հոգեւոր Ճեմարանի վարդապետները եւ սաները: Մեր այսօրուայ հանդիպման նպատակը աղօթելն է վարդապետների եւ մայրապետների կոչումների համար, քանի որ ոչ միայն Հայ Կաթողիկէ Եկեղեցւոյ մէջ, այլեւ աշխարհի բոլոր Եկեղեցիներում տարէց տարի նուազում է կոչումների թիւը: Այդ իսկ պատճառով, այսօր, մեր վարդապետի առաջարկութեամբ որոշեցինք հաւաքուել եւ մեր միասնական աղօթքը բարձրացնել առ Աստուած: Սիրելի՛ Հայր Սուրբ եւ սիրելի՛ ժառանգաւորներ, բարի եկած էք, Փանիկը ձեր տունն է»:

Այնուհետեւ, Հայր Սուրբը խօսքը փոխանցեց Գերպ. Հայր Մաշտոց Վրդ. Զահթերեանին: Վերջինս ողջունեց ներկաներին, ապա՝ վերյիշեց, թէ ինչպէս երկու տարի առաջ, երբ Ամենապատիւ եւ Գերերջանիկ Կաթողիկոս-Պատրիարքի կողմից նշանակուել էր ծառայութեան Հայաստանում եւ դեռ նոր էր իր առաքելութիւնը սկսել՝ առաջին անգամ Գերյարգելի Հ. Գառնիկ Ծ. Վրդ. Յովսէփեանի կողմից հրաւիրուեց Փանիկ՝ Զմմառի Տիրամօրը նուիրուած մոմավառութեան մատուռի բացման եւ սրբապատկերների օծման արարողութեանը մասնակցելու: Գերապատիւ վարդապետը նաեւ նշեց, թէ որքան թարմ են այն յիշողութիւնները, երբ Փանիկի Եկեղեցւոյ վերանորոգման ընթացքին պատարագ էին մատուցում լսարանի շէնքի մէջ: Վարդապետը վկայեց այն մասին, որ Փանիկ համայնքն իր առանձնայատուկ տեղն ունի ինչպէս նրա, այդպէս էլ Հայ Կաթողիկէ Եկեղեցւոյ սրտում: Ուստի, այս Եկեղեցւոյ նկատմամբ ունեցած ակնածանքով վերստին դառնում են դէպի Նա եւ որոշում Ճեմարանի քարոզչութեան եւ նոր կոչումներին նուիրուած աղօթքի օրը կազմակերպել Փանիկի Սուրբ Աստուածածին Հայ Կաթողիկէ Եկեղեցւոյ մէջ՝ չնայած այս տարածաշրջանի խիստ ձմռանը, ակնկալելով ստանալ Փանիկի Սուրբ Տիրամօր օրհնութիւնը, ինչպէս նաեւ հաւատաւոր ժողովրդի աղօթքների միջնորդութիւնն առ Աստուած: Մեծաւոր հայրը նշեց, որ այս կիրակի համընկնում են մի քանի տօներ՝ երկրորդ կիրակին է Յայտնութեան շրջանի եւ Կաթողիկէ Ընդհանրական Եկեղեցւոյ մէջ սկսւում են Եկեղեցւոյ միութեան աղօթքները, երբ համայն կաթողիկէ հաւատացեալները, անկախ ազգային պատկանելիութիւնից, աղօթում են համայն աշխարհի Եկեղեցիների միութեան համար: Հետեւաբար, կոչ արեց ներկաներին միասին ու միատեղ աղօթել՝թէկուզ իւրաքանչիւրն իր մտայնութեամբ, իր սովորութեամբ, իր պատմութեամբ, սակայն ճանապարհը լինի մէկը, ինչպէս մէկ էին Քրիստոսի առաքեալները: Վարդապետը յիշեցրեց, որ Սրբազան Քահանայապետն այս օրը հռչակել է Աստուածաշնչի ընթերցումի կիրակի եւ ընդգծեց, որ այսօր իրականութիւնը բոլորովին այլ է. «Դժբախտաբար, 21-րդ դարում մեր ընտանիքների մէջ պակասել են հոգեւոր դիտաւորութիւնները, պակասել է Աստուածաշնչի ընթերցումը, պակասել է ընտանիքի հաւաքոյթը Աստուծոյ խօսքի շուրջ: Ուստի, մենք բոլորս պէտք է վերադառնանք մեր հաւատքի ակունքին եւ մեր ընտանիքների ներսում հաւաքուենք Աստուծոյ խօսքի շուրջ, որպէսզի կարողանանք ընթանալ որպէս ճշմարիտ քրիստոնեաներ Աստուծոյ ճանապարհի մէջ»:

Գերպ. Հայր Մաշտոցը շնորհակալութիւն յայտնեց՝ ընդգծելով, որ որպէս Սրբոց Հրեշտակապետաց Հայ Կաթողիկէ Միացեալ Հոգեւոր Ճեմարան, նրանց համար մեծ պատիւ է Գերյարգելի ժողովրդապետի հրաւէրով գտնուել այստեղ եւ հնարաւորութիւն ունենալ աղօթելու նոր կոչումների համար, որպէսզի Աստուած նոր մշակներ ուղարկի: Մշակներ, ովքեր անհրաժեշտ են ոչ թէ հոգեւորականներին, այլ հաւատացեալ ժողովրդին. «Մենք բոլորս կանչուած ենք Աստուծոյ կողմից՝ ծառայելու մարդկանց հոգիներին եւ մեր բարի օրինակով ցոյց տալու Քրիստոսի ճանապարհը՝ Երկինք տանող ճանապարհը, այնտեղ՝ ուր խաղաղութիւն եւ երջանկութիւն կայ եւ նիւթապաշտութիւն չկայ, մարդկային շահ չկայ, որտեղ միակ շահը հոգեւորն է, միակ շահը Աստուծոյ խօսքն է»:

Ճեմարանում այսօր ուսանում են ութ ժառանգաւորներ, եւս երկուսը Լեհաստանում եւ երեքը Իտալիայում, ովքեր շարունակում են իրենց բարձրագոյն կրթութիւնը՝ հետեւելով Փիլիսոփայութեան եւ Աստուածաբանութեան դասընթացքներին: Հայր Սուրբը կոչ արեց բոլորին միասնաբար աղօթել, որպէսզի նրանք կարողանան հաստատ մնալ իրենց կոչման մէջ, որպէսզի այս ժառանգաւորներից եւ ոչ մէկը չը մտափոխուի եւ աշխարհի այս հոսանքը նրանց իր հետեւից չը տանի: «Մենք պէտք է աշխատենք միասնաբար, որպէսզի կարողանանք մեր Սուրբ Եկեղեցւոյ եւ համայն աշխարհի Հայ Կաթողիկէ Եկեղեցւոյ համար հոգեւոր սպասաւորներ պատրաստել: Եթէ դուք չընդունէք ձեր զաւակներին նուիրել Աստծոյ կանչին, ապա մեղաւոր էք Աստուծոյ առաջ եւ մենք մեղաւոր ենք՝ եթէ չը քաջալերենք: Եւ մենք բոլորս մեղաւոր ենք, եթէ Աստուծոյ ձայնի եւ կանչի առջեւ մեր դռները փակենք: Այո՛ չ'պէտք է մերժել Աստուծոյ կանչը: Ամէն անգամ այս մասին խօսելիս յուզւում եմ, քանի որ զգում եմ, որ անարժան եմ այս գաւազանն ու զգեստը կրելու, սակայն Աստուած է, որ մեզ արժանի է դարձնում, որպէսզի կարողանանք ծառայել»: Վարդապետը յատկապէս շեշտեց, որ քահանան պէտք է ծառայութեան հոգին ունենայ իր մէջ:

Նա նաեւ ասաց, որ Քրիստոս երբեք իր Եկեղեցին չի թողնում, եւ, ինչպէս Աւետարանում է ասւում. «Դժոխքի դռները չպիտի յաղթեն մեզ, որքան էլ որ աշխարհիկ կեանքը դժուար լինի, որքան էլ որ մարդիկ հեռանան Աստծուց եւ հաւատքից, այնուամենայնիւ, Աստուած երբեք մարդուն մենակ չի թողնի: Եկեղեցւոյ խորհուրդների մէջ շատ հետաքրքրական մի բան կայ. կեանքում մենք Մկրտութիւնը եւ դրոշմը ստանում ենք մէկ անգամ: Եթէ լինենք անհաւատ, հեռանանք մեր կրօնից եւ դաւանափոխ լինենք, այնուհետեւ՝ մէկ օր արթնանանք ու զգանք Աստուծոյ սէրը մեր մէջ եւ վերադառնանք հաւատքի եւ Եկեղեցուն, ապա՝ Եկեղեցին մեզ նորից Մկրտութեան խորհուրդը չի տալիս, որովհետեւ մենք միշտ Աստուծոյ զաւակներն ենք: Եկէ՛ք այսօր աղօթքով փառաբանենք Աստծուն եւ վերստին մեր մէջ արթնացնենք հաւատարիմ զաւակի սկզբունքները եւ երբեք չվարանենք նուիրուելու Աստծուն: Մենք բոլորս հաւասար ենք Աստուծոյ առաջ եւ այդ հաւասարութեան մէջ մեզանից իւրաքանչիւրն իր լուման պէտք է ներդնի, որպէսզի կարողանանք պահել մեր Եկեղեցին, որը մեզ բոլորիս համախմբում է: Գուցէ մեր մարդկային թուլութիւնների պատճառով որոշ խնդիրներ ունենանք մեր ընտանիքների մէջ, սակայն մենք բոլորս համախմբւում ենք Եկեղեցւոյ մէջ, Աստուծոյ դիմաց, Քրիստոսի Սուրբ մարմնի եւ արեան դիմաց, հետեւաբար՝ հաւաքուենք, միանանք, միախմբուենք եւ մեր սրտերն ու հոգիները տանք Աստծուն, որպէսզի կատարենք լաւագոյնը: Կրկին անգամ շնորհակալութիւն այս գեղեցիկ օրուայ համար: Եկէ՛ք քաջալերենք մեր սաներին եւ իմացէ՛ք, որ մեր դռները, Անարատ Յղութեան Հայ Քոյրերի եւ մեր բոլոր վանքերի դռները միշտ բաց են ձեր առաջ: Հաւատացեալները սիւնն են Եկեղեցւոյ, միշտ մնացէ՛ք հաստատ եւ միացած մեզ հետ աղօթքով»:

Պատարագը սպասաւորեցին Ճեմարանի սաները: Պատարագի աւարտին ժառանգաւորները փոխտեսուչի հետ միասին պատրաստել էին կոչումների մասին տեսանիւթեր, որոնցում ընդգծուած էին նոր կոչումների անհրաժեշտութիւնը եւ հաւատքի ամրապնդման կարեւորութիւնը: Ճեմարանի սաները բեմադրեցին նաեւ «Հարուստ երիտասարդի առակը»: Վերջաւորութեանը տեղի ունեցաւ հիւրասիրութիւն:

Գերյ. Հայր Գառնիկ Ծ. Վրդ. Յովսէփեանն իր եւ ներկաների անունից առանձնայատուկ շնորհակալութիւն յայտնեց Սրբոց Հրեշտակապետաց Հայ Կաթողիկէ Միացեալ Հոգեւոր Ճեմարանի մեծաւորին սրտաբուխ խօսքերի համար, եւ փոխմեծաւորին ու ժառանգաւորներին՝ պատրաստած ներկայացման համար, միեւնոյն ժամանակ ընդգծելով, որ իսկապէս, միասնական աղօթքը մեծ ուժ է:

Գերյ. Հ. Գառնիկ Ծ. Վրդ. Յովսէփեան

Փանիկի Սուրբ Աստուածածին Եկեղեցւոյ Ժողովրդապետ

Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ

21/01/2020, 08:32