«Խորհուրդ մեծ եւ սքանչելի...» Հայր Գէորգ Ծ. Վրդ. Զապարեանի խորհրդածութիւնը։
Մինչ կը պատրաստուինք Սուրբ Ծնունդի ձեռակերտ մսուրի մը տեսարանը պատկերացնել` անոր մէջ զետեղելով կովի, իշու, հովիւներու, Մարիամի, Յովսէփի եւ նորածին Յիսուսի արձանիկները, պատեհութիւնը կ'ընծայուի իւրաքաչիւրիս՝ խոկալու մեզի հանդէպ Աստուծոյ տածած սիրոյ Խորհուրդի մասին:
Յիսուսի Ծնունդը Աստուծոյ իրագործած վեհագոյն բարեգործութիւնն է, որ լաւագոյնս կ'արտայայտէ Արարիչին հայրական սէրը իր ստեղծագործութեան հանդէպ: Արդարեւ, ամբողջ մարդկային ցեղին փրկութիւնը, սրբացումն ու յաւիտենական երջանկութիւնը կախեալ է Աստուածորդիին Մարդեղութեան Խորհուրդէն:
Յիսուս, Բանն Աստուած, Ամենասուրբ Երրորդութեան Երկրորդ Անձը, մարմնանալով ու մարդանալով՝ հանդիսացաւ միակ ակնաղբիւրը մեր փրկութեան, մեր սրբութեան եւ մեր յոյսին՝ օր մը մասնակից դառնալու Ստեղծիչին յաւիտենական կեանքին:
Առանց Յիսուսի, ի վիճակի պիտի չըլլայինք զԱստուած «Հայր մեր» կոչելու:
Պիտի չկարենայինք զԻնք սիրել ինչպէս զաւակ մը իր հայրը կը սիրէ:
Եկեղեցւոյ երեւելի քարոզիչներէն մէկը հետեւեալ լուսաբանութիւնը կու տայ ըսելով՝ «Կարծեմ, թէ Աստուած Ինքնիրեն ըսած ըլլալու էր. -Մարդ արարածը զիս չի' սիրեր, քանի որ զիս չի' տեսներ: Առ այդ, լաւ կ'ըլլայ, որ Ինքզինքս ֆիզիքապէս ցոյց տամ իրեն, որպէսզի ան զիս սիրէ-: Աստուծոյ սէրը շօշափելի եւ տեսանելի չէր, մինչեւ այն օրը երբ զայն յայտնեց՝ յանձին մսուրին մէջ պառկած մանկացեալ Յիսուս Քրիստոսի»:
Այս ճշմարտութեան կ'արձագանգեն Սուրբ Ծննդեան նուիրուած մեր հայ շարականները. «Խորհուրդ մեծ եւ սքանչելի, որ յայսմ աւուր յայտնեցաւ...Ծնաւ նոր արքայ ի Բեթղեհէմ քաղաքի...Անբաւելին երկնի եւ երկրի ի խանձարուրս պատեցաւ...» (Խորենացի)
Այս ճշմարտութեան հիման վրայ, մինչ կը սպասենք Սուրբ Ծնունդով ոգեւորուելու՝ գործնական բարի առաջադրութիւններով դիմաւորենք Յիսուսի Քրիստոսի Մարդեղութեան Խորհուրդը:
Հետեւաբար, այս օրհնեալ օրերուն, մինչ կը մտածենք հաճելի եւ օգտաւէտ նուէրներ ընծայելու մեր ընտանիքի անդամներուն ու բարեկամներուն, առաջադրենք նուէր մը եւս վերապահել Մանուկ Յիսուսի,
- Ժամանակ գտնելով՝ ամփոփուելու համար Անոր ներկայութեան մէջ, որպէսզի զԻնք գովաբանենք եւ Անոր շնորհակալութիւն յայտնենք՝ իր Մարդեղութեամբ մեզի ընձեռած կարելիութեան մեղքէն ու մահէն փրկուելու:
- Օգնութեան հասնելով կարիքաւորներուն եւ անոքներուն:
- Դիմելով Խոստովանանքի Խորհուրդին, հայրական ներում ու սրբարար շնորհք ընդունելու համար,
- Ներելով անոնց, որոնք մեզի հանդէպ յանցանք գործած են:
Որովհետեւ,
- Երբ աղօթագին ծնրադրենք Յիսուսի առջեւ, Ան մեզի չի' զլանար Իր խաղաղութիւնը:
- Երբ բարեգթութեամբ վարուինք կարիքաւորներուն հետ, Ան առաջքը կ'առնէ մեր կարօտութիւններուն եւ իր պարգեւներով մեզ կ'ողողէ:
- Երբ Խոստովանանքի Խորհուրդին դիմենք, Ան մեզ կը լիացնէ Իր անհուն ողորմութեամբ:
- Երբ ուրիշներուն ներենք մեզ վիրաւորող յանցանքները, Ան կը բուժէ մեր կրած վէրքերը:
Այ'ս է հրեշտակին աւետած Բարի Լուրին բովանդակալից իմաստը. « Ձեզի աւետիս մը պիտի տամ...Այսօր, Դաւիթի քաղաքին մէջ ձեր Փրկիչը ծնաւ» : (Ղուկաս 2, 10-11)
Օրհնաբեր Սուրբ Ծնունդ եւ բարեբեր երջանիկ Նոր Տարի:
Հայր Գէորգ Ծ. Վ. Զապարեան
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ