Որոնել

Vatican News
Վաղաժամ ծննդաբերութիւն. 21 տարեկան Իմանը եւ դուստրը՝ Ժուլանը Վաղաժամ ծննդաբերութիւն. 21 տարեկան Իմանը եւ դուստրը՝ Ժուլանը   Պատմութիւնը

Ծնուել Բեթղեհէմում

Յիսուսի հայրենի քաղաքում՝ Բեթղեհէմում, Կաթողիկէ Ծննդատունը պաղեստինեան տարածաշրջանում անգնահատելի բժշկական օգնութիւն է տրամադրում, միեւնոյն ժամանակ համաշխարհային խաղաղութեան ուղերձ յղում, ինչը լիովին դուրս է իր բժշկական ոլորտից:

Օլիւիէ Բոննել – Բեթղեհէմ

Բեթղեհէմի Սուրբ Ընտանիք Ծննդատան դեղնաշագանակագոյն պատերով վիթխարի շէնքի հարեւան խաչմերուկում՝ մի քանի մեթր հեռաւորութեան վրայ կարելի է տեսնել Սուրբ Ծննդեան Տաճարը: Նոյեմբեր ամսի վերջին բազմաթիւ ուխտաւորներ՝ ժամանած Իտալիայից կամ Պրազիլից, խռնուելով պաղեստինեան քաղաքի փողոցներում՝ ուղղւում են դէպի Քրիստոսի ծննդավայր, որտեղ հսկայ եղեւնու եւ մսուրի շուրջը վերջին զարդարանքներն են աւարտին հասցւում: 1882 թուականին Սուրբ Վենսան դը Փոլի Գթութեան դուստրերի կողմից կառուցուած հիւանդանոցի միջանցքներում մթնոլորտն աւելի խաղաղ է, քան դէպի տաճար տանող փողոցներում:

Սուրբ Ընտանիք Հիւանդանոցի տնօրէն Դընի Սեւեստրը
Սուրբ Ընտանիք Հիւանդանոցի տնօրէն Դընի Սեւեստրը

1990 թուականին, առաջին երեխայի ծնունդից ի վեր, Սուրբ Ընտանիք Ծննդատունը դարձել է մեկնակէտ պաղեստինցիների համար: Հաստատութիւնը, որը կառավարւում է Մալթայի Միաբանութեան կողմից, լաւագոյն բժշկական ծառայութիւններն է տրամադրում տարածաշրջանի յղի կանանց եւ նորածիններին: Մանկաբուժութեան եւ նորածնային խնամքի բաժանմունքը, որի բացումը տեղի ունեցաւ 2013 թուականին՝ ոչ մի բանով չի զիջում երկրագնդի լաւագոյն հիւանդանոցներին: Չնայած պատմութեան կարեւորութեանը եւ աւետարանական պատմուածքի ուժին՝ Բեթղեհէմում ծնուել միշտ չէ, որ նշանակում է երջանիկ աստղի տակ ծնուած լինել: Առողջապահութեան պետական համակարգը տկար է, գտնւում է բիւրոկրատական եւ յատկապէս՝ ծանր քաղաքական համատեքստի ճնշման ներքոյ:

Ծնուել Բեթղեհէմում

«Մեզ մօտ միշտ էլ տեղ կայ»

Իրականում, այն ժամանակից ի վեր, ինչ հարեւան Իսրայէլի հետ խաղաղութիւն ձեռք բերելու յոյսերը նուազեցին, պաղեստինցիների առօրեայ կեանքը բաւական մռայլ է: Երուսաղէմը ընդամէնը ութ քիլոմեթր հեռաւորութեան վրայ է գտնւում, սակայն սուրբ քաղաքը երբեք այդքան հեռու չէր թուացել, որքան հիմա է: «Ամենօրեայ անվտանգութեան վերահսկողութիւն է իրականացւում, եւ ամէն օր կարող էք տեսնել, թէ ինչպէս են Բեթղեհէմի բնակիչները անցակէտերում առաւօտեան ժամը 5-ից սկսած հերթ կանգնում, որպէսզի կարողանան ժամանակին հասնել աշխատանքի վայր», - ասում է Դընի Սեւեստրը՝ Ծննդատան տնօրէնը: Այս ֆրանսիացի նախկին զինուորականն արդէն հինգ տարի է, ինչ կնոջ հետ միասին բնակութիւն է հաստատել Բեթղեհէմում: Մալիում եւ Աֆղանիստանում ականազերծման աշխատանքներ իրականացնելուց յետոյ՝ տեղափոխուելով Բեթղեհէմ, ստանձնել է հիւանդանոցի եւ 140 աշխատակիցների կառավարման գործը, չնայած նիւթատեխնիկական ապահովման սահմանափակումներին եւ շարունակական ճնշումներին: «Մեզ մօտ միշտ էլ տեղ կը գտնուի», - խօսքն ամփոփելով ասում է նա: Որոշ կանայք, ովքեր գալիս են մեր հիւանդանոցում ծննդաբերելու, չեն վարանում ժամեր շարունակ ճանապարհ կտրել եւ հանդուրժել իսրայէլական բանակի մանրազնին ստուգումները: Բայց, ինչպէս եւ ամէն անգամ, այստեղ է ծնւում հրաշքը: Կանայք (մեծամասամբ մահմետական) վերցւում են հոգածութեան տակ, իսկ նորածինների խանձարուրների վրայ պատկերուած է Մալթայի խաչը:

Սուրբ Ընտանիք հիւանդանոցի միջանցքներում
Սուրբ Ընտանիք հիւանդանոցի միջանցքներում

«Եթէ Աստուած կամենայ՝ խաղաղութիւնը սկիզբ կ'առնի այստեղից»

Բարդ դէպքերի ժամանակ մանկաբուժական խնամքի ծառայութիւնը յայտնւում է իրարանցման մէջ: «Մեր հաստատութիւնը բարեգործական հիւանդանոց է», - պարզաբանում է Դընի Սեւեստրը՝ ընդգծելով իրենց հաստատութեան նպատակը. տրամադրել որակեալ ծննդօգնութիւն՝ առանց կրօնական կամ ֆինանսական միջոցների խտրականութեան: Ի դէպ, Սուրբ Ընտանիք հիւանդանոցը աշխատանքի է ընդունել սոցիալական աշխատակցի, ով ուսումնասիրում է ամենահամեստ հնարաւորութիւններ ունեցող ընտանիքների անձնական գործերը: Որոշ հիւանդներ վճարում են ընդամէնը մէկ խորհրդանշական շէկել:

Հիւանդանոցի անձնակազմի 56%-ը քրիստոնեաներ են, շատ աւելին, քան Պաղեստինի միջին ազգային ցուցանիշն է, սակայն Սուրբ Ընտանիքում ուշադրութիւն չեն դարձնում ո՛չ գլխանոցներին եւ ո՛չ էլ պարանոցի խաչերին, որ կրում են մայրերը: Բացի բժշկական բարձրակարգ ծառայութիւններից, որ մատուցում է հիւանդանոցը, նաեւ այս բարձրակարգ ընդունելութիւնն է, որ ստիպում է բազմաթիւ պաղեստինցիների գալ այստեղ եւ կեանք պարգեւել իրենց զաւակներին: «Երեխային այստեղ ծնունդ տալը յատուկ նպատակ ունի, քանի որ սա սուրբ քաղաք է», - պատմում է Բութէինան, ով օրօրում է Ալիին՝ երկու օր առաջ լոյս աշխարհ եկած իր որդուն: 28-ամեայ այս մահմետական կնոջ համար Բեթղեհէմը Յիսուսի քաղաքն է, ով Ղուրանում յիշատակւում է որպէս մարգարէ, իսկ Սուրբ Ընտանիք հիւանդանոցը՝ խաղաղութեան նաւահանգիստ:

Բուժքոյրերը Ծննդատան մանկական սենեակում
Բուժքոյրերը Ծննդատան մանկական սենեակում

«Քաղաքական գործիչները պատեր են կառուցում, բժիշկները բացում են սրտերը»

Պաղեստինեան հիւանդանոցի բարերար ազդեցութիւնն այսուհետեւ իրականութիւն է: Բոլոր բժիշկները, ովքեր պաղեստինցիներ են, դասընթացք են անցել արտերկրում՝ Ֆրանսիայում, Միացեալ Նահանգներում կամ Ուկրաինայում: Բուժքոյրերից երկուսը նոյնիսկ վերապատրաստում են անցել Հռոմի Մանուկ Յիսուս մանկական հիւանդանոցում: «Արդիւնքում, Վատիկանի խնդրանքով, այս բուժքոյրերը տեղի անձնակազմի համար անցկացրեցին վերապատրաստման դասընթացք», - հպարտօրէն ժպտում է Դընի Սեւեստրը: Նախկին զինուորականը սիրում է յաճախ կրկնել. «Քաղաքական գործիչները պատեր են կառուցում, մինչդեռ բժիշկները բացում են սրտերը»: Սա է իւրաքանչիւր պարտուողական խօսքի հակաթոյնը:

Կանխածին երեխաների սրահում 21-ամեայ Իմանը հսկում է դստեր՝ Ժուլանի քունը: Երեխան ծնուել է ժամկէտից չորս ամիս առաջ եւ կշռում էր ընդամէնը 830 գրամ: Ամէն օր այս երիտասարդ կինը, ով գլխանոց է կրում, երթուդարձ է կատարում Հեբրոնից, որը Բեթղեհէմից 25 քիլոմեթր հեռաւորութեան վրայ է գտնւում, սակայն, երբեմն ժամ եւ կէս է պահանջւում ճանապարհն անցնելու համար: Նորածնային ինտենսիւ խնամքի բաժանմունքը հրաշքներ գործեց եւ Իմանի դուստրն այսօր կշռում է 2,5 կիլօգրամ: Այնուամենայնիւ, երեխան դեռեւս պէտք է նեարդավիրաբուժական միջամտութիւն ստանայ Երուսաղէմի հիւանդանոցում:

Վիրահատական սրահի դռան վերեւում տեղադրուած է Սուրբ Ընտանիքի պատկերը, որը հետեւում եւ պահպանում է բոլորին
Վիրահատական սրահի դռան վերեւում տեղադրուած է Սուրբ Ընտանիքի պատկերը, որը հետեւում եւ պահպանում է բոլորին

Անվտանգութիւնն ապահովելուց առաջ անհրաժեշտ է կարեկցանք դրսեւորել

Հիւանդանոցի բակի հին մատուռում վեր է խոյանում Աստուածամօր արձանը, որը գիշերային լուսաւորութեան մէջ թւում է, թէ արթուն հսկում է քաղաքն ու շրջակայքը, ինչպէս Մարիամն էր մսուրում հսկում Մանուկ Յիսուսի քունը: Այգում կան բազմաթիւ նարնջենիներ ու ձիթենիներ, որոնք խաղաղութեան խորհրդանիշներն են, եւ թւում է, թէ դրանք այստեղ տնկել են որպէս վկայութիւն:

Ծագումով Ջենինից Ահմեդը տեսակցում է նոյն առաւօտ ծնուած որդուն
Ծագումով Ջենինից Ահմեդը տեսակցում է նոյն առաւօտ ծնուած որդուն

Մի քանի օրից մեծ եղեւնի կը տեղադրուի Ծննդատան սրահներից մէկում եւ աշխատակազմի անդամներից իւրաքանչիւրն իր ձեռքով կը զարդարի այն: Բեթղեհէմի քրիստոնեաները Սուրբ Ծնունդը տօնում են երեք անգամ՝ դեկտեմբերի 25-ին կաթողիկէների համար, յունուարի 6-ին՝ ուղղափառների, իսկ յունուարի 19-ին հայերի համար: Երեք պատճառ Քրիստոսի ծնունդը ցնծութեամբ տօնելու:

Ծննդատան տնօրէնն իր խօսքի մէջ յիշատակում է նաեւ իսրայէլցի զինուորներին, ովքեր անցակէտում օգնում են տեղափոխել նորածին երեխաներին: Նոյնիսկ եթէ դա տեսանելի չէ առաջին հայեացքից, այնուամենայնիւ, հէնց այստեղ՝ Բեթղեհէմի կեանքի այս փոքրիկ դրուագներում կարելի է տեսնել Խաղաղութեան Իշխանի հրաշքը:

Թարգմանեց՝ Հրանուշ Սարգսեանը

24.12.2019

24/12/2019, 09:47