«Եկեղեցին եւ ընտանիքը 21րդ Դարում» խորագիրով միջազգային համաժողով:
ԵՐԵՒԱՆ, «Փանորամա».- 10 Հոկտեմբերին, Մայր Աթոռ Սուրբ Էջմիածինի մէջ մեկնարկեց «Եկեղեցին եւ ընտանիքը 21րդ դարում. արժէքներ եւ մարտահրաւէրներ» խորագիրով միջազգային համաժողովը, որուն կը մասնակցին Մայր Աթոռի միաբաններ, քոյր եկեղեցիներու ներկայացուցիչներ, պետական այրեր, գիտնականներ եւ հասարակական գործիչներ՝ Հայաստանէն, Ռուսիայէն, Իրլանտայէն, Աւստրիայէն, Պելճիքայէն եւ Ֆինլանտայէն։
Ժողովին խօսք առնելով՝ Ամենայն Հայոց Գարեգին Բ. կաթողիկոս ըսաւ. «Արդի աշխարհում վտանգւում են ընտանիքի եւ նրա առաքելութեան մասին ընկալումները: Տարածում են գտնում ընտանիքի նուիրական գաղափարը աղճատող եզրոյթներ եւ հասկացութիւններ, որոնք ներկայացւում են իբրեւ ժամանակակից կեանքի թելադրանքներ»: Ըստ անոր՝ արդի ժամանակներու լրջագոյն մտահոգութիւններէն է նաեւ ընտանիքներու քայքայումը, ամուսնալուծութիւնը, որ մեծ թիւ կը կազմէ աշխարհին, նաեւ Հայաստանի մէջ։
«Անհանգստացնող այս իրողութեան պատճառները տարբեր են՝ սոցիալական, տնտեսական, բարոյական, նաեւ տեխնոլոգիաներից կախուածութիւնը, որը վնասում է ընտանիքում միջանձնական յարաբերութիւններին: Այս մարտահրաւէրների համատեքստում մենք կարեւորում ենք համագործակցութիւնը պետութեան հետ՝ ի նպաստ ընտանիքների պահպանման ու ամրապնդման եւ առկայ սպառնալիքների կանխարգելման: Յիրաւի, ամուր եւ քրիստոնէական արժեհամակարգ կրող ընտանիքը նշանակում է երկրի, պետութեան երաշխաւորուած ապագայ:
ընտանիքի առջեւ ծառացած հիմնախնդիրները վեր հանելու, անդրադարձ կատարելու եւ յաղթահարելու տեսլականով մենք 2019 թուականը հռչակեցինք Ընտանիքի տարի, որպէսզի այդ առումով իրագործուեն առաւել նպատակային քայլեր ու նախաձեռնութիւններ: Մեր սուրբ եկեղեցու հովիւները համայնքներում գնահատելի սպասաւորութիւն են մատուցում ընտանիքների ամրութեան ու զօրացման ուղղութեամբ: Մայր Աթոռ սուրբ Էջմիածինը իրականացնում է մի շարք սոցիալական (ընկերային-Խմբ.) ծրագրեր: Մայր Աթոռի միաբանական ժողովի մասնակիցներն այցելել են Հայաստանի տարբեր շրջաններում ապրող կարիքաւոր ընտանիքներին՝ բերելով իրենց օրհնութիւնն ու եկեղեցու նիւթական աջակցութիւնը: Մենք նոյնպէս մեր հանդիպումներում, մեր քարոզներում ու խօսքերում անդրադառնում ենք ընտանեկան խնդիրներին: Առաջիկայ ամիսներին ծրագրում ենք նոր հանդիպումներ, յատկապէս՝ բազմազաւակ ընտանիքների հետ: Այս ծրագրերը շարունակական են, որոնց ընթացքը պիտի նշանաւորուի ամավերջին ընտանիքների օրհնութեան յատուկ արարողութեամբ», հաստատեց ան։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
