Արամ Ա. Կաթողիկոս ընդունեց Միացեալ Ազգերու Կազմակերպութեան ներկայացուցիչը
Երեքշաբթի, 10 սեպտեմբեր 2019-ին, Ս. Աստուածածին վանքին մէջ, Արամ Ա. վեհափառ հայրապետին այցելեց Միացեալ ազգերու կազմակերպութեան (ՄԱԿ) ընդհանուր քարտուղարի ներկայացուցիչ Իան Քուպիչ:
Հանդիպումը առիթ մը հանդիսացաւ արծարծելու հետեւեալ հարցերը. Լիբանանի այժմու կացութիւն, Միջին Արեւելքի դիմագրաւած մարտահրաւէրներ, քրիստոնէական ներկայութիւնը շրջանին մէջ, քրիստոնեայ-իսլամ երկխօսութիւն, ՄԱԿ-ի դերը միջազգային գետնի վրայ:
Յիշեալ հարցերուն շուրջ աւելի քան ժամ մը տեսակէտներու փոխանակում տեղի ունեցաւ ՄԱԿ-ի ներկայացուցիչին եւ վեհափառ հայրապետին միջեւ: Անոնք կարեւորութեամբ շեշտեցին, որ ներկայ աշխարհը յուզող կարգ մը հարցերու շուրջ կրօնին դերակատարութիւնը կը մնայ միշտ էական:
Ապա, Քուպիչ ՄԱԿ-ի ընդհանուր քարտուղար Անթոնիօ Կութիերեսի կողմէ նամակ մը յանձնեց վեհափառ հայրապետին, եւ որոշուեցաւ մօտ ապագային երկրորդ հանդիպում մը կայացնել վեհափառ հայրապետին եւ ՄԱԿ-ի ներկայացուցիչին միջեւ` շարունակելու իրենց քննարկումները:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ