Cerca

Vatican News
Գարեգին Բ Ամենայն հայոց կաթողիկոսը Գարեգին Բ Ամենայն հայոց կաթողիկոսը 

Գարեգին Բ. Կաթողիկոսին Ս. Զատկուան Պատգամը։

Քրիստոսով յարութեան եւ յաւիտենական կեանքի ուղին սկսւում է այս աշխարհից, մարդու կեանքի վերափոխումից, մեղքի ու չարիքների մերժումից, դէպի սրբութիւն ու կատարելութիւն ընթացքից:

Յանուն Հօր եւ Որդւոյ եւ Հոգւոյն Սրբոյ. ամէն:

«Յարեաւ Աստուած եւ ցրուեցան ամենայն թշնամիք Նորա»
(Ժամագիրք):

Սիրելի՛ հաւատաւոր զաւակներ մեր,

Սուրբ Յարութեան տօնի ուրախութիւնն է համակել մեր հոգիները, Յարութեան յաղթական բերկրանքն է ամէնուր` մեր շուրջը, մեր եկեղեցիներում, ընտանիքներում, քրիստոնեայ ողջ աշխարհում, նաեւ` բնութեան զարթօնքի մէջ: Քրիստոս յաղթական ելել է փակուած քարանձաւից, եւ հրեշտակը Նրա Յարութեան աւետիսն է հնչեցնում թափուր գերեզմանից: Փրկչի յաղթանակով փշրուել են մեղքի ու մահուան կապանքները, բացուել են դռները երկնքի արքայութեան եւ մարդկանց ընծայւում է աստուածային շնորհը` ժառանգելու յաւիտենական կեանքի անգին պարգեւը. «Ես իսկ եմ յարութիւն եւ կեանք. ով հաւատում է Ինձ, թէպետ եւ մեռնի, կ՛ապրի. եւ ով կենդանի է ու Ինձ հաւատում է, յաւիտեան չի մեռնի» (Յովհ. 11.25-26):

Քրիստոսով յարութեան եւ յաւիտենական կեանքի ուղին սկսւում է այս աշխարհից, մարդու կեանքի վերափոխումից, մեղքի ու չարիքների մերժումից, դէպի սրբութիւն ու կատարելութիւն ընթացքից: Արդարեւ, որտեղ բաց են մարդկային հոգիները Քրիստոսի յարութեան լոյսի առջեւ, այնտեղ ցրւում ու նահանջում են խաւարները աստուածամերժ չարահնար խորհուրդների, մոլորեցնող գաղափարախօսութիւնների, բաժանումների ու բեւեռացումների, անհանդուրժողականութեան, թշնամութեան ու պառակտումի, եւ հաստատւում են համերաշխութիւն ու միաբանութիւն, հաւատարմութիւն, սրբութիւն, սէր եւ ուրախութիւն: «Աստուած յարութիւն առաւ, եւ ցրուեցին Նրա բոլոր թշնամիները», օրհնաբանում է ժամասացը:

Աշխարհի խաղաղութեան, հասարակութեան բարօրութեան, մարդկութեան ներդաշնակ գոյակցութեան, ընտանիքների ամրութեան եւ ամենայն բարիքի հակառակ են այն ընթացքները, որոնք մերժում են Քրիստոսով նորոգութիւնը եւ գերի դարձնում կեանքը մեղքին, ենթարկում աղաւաղումների ու կործանման:

Քրիստոսի յարութեան աւետիսը հրաւէր է ամէնքին` ապրելու Փրկչի պարգեւած շնորհներով` որպէս նոր մարդ, ինչպէս պատգամում է առաքեալը. «Հեռո՛ւ վանեցէք ձեզնից հին մարդուն իր նախկին կենցաղով, այն, որ ապականուած է խաբեպատիր ցանկութիւններով. նորոգուեցէ՛ք ձեր մտքով եւ հոգով ու հագէ՛ք նոր մարդը, որ ստեղծուած է ըստ Աստծու` արդարութեամբ եւ ճշմարիտ սրբութեամբ» (Եփ. 4.22-24): Հաւատալ Քրիստոսի յարութեանը եւ Քրիստոսով մեր յարութեանը ու մեր կեանքի վերափոխմանը, նշանակում է ո՛չ միայն յաղթանակ տանել մեղքի, մոլութիւնների ու մոլորութիւնների դէմ, այլեւ սիրով համակուել ամէնքի հանդէպ` մերժելով արդարութեան, արժանապատուութեան եւ ամենայն մարդկայինի ոտնահարումները, տարածել հոգատարութիւն ու համընդհանուր հաճութիւն, ինչպէս Քրիստոս, «որ եկաւ եւ փրկեց բոլոր արարածներին» (շարական): Յարութեան շնորհն ընդունած քրիստոնեայի կեանքում տեղ չունեն ագահութեան, անիրաւութեան, ատելութեան, բռնութիւնների եւ Աստծոյ պատուիրանները անտեսող այլ դրսեւորումները, որոնք մեղքից ու մահից Քրիստոսի պարգեւած ազատութեան մերժումն են եւ վերացնում են բարին ու բարիքը մարդու, ընտանիքի, երկրի կեանքից: Ազատութիւնը տրուած է բարին ընտրելու եւ ո՛չ թէ չարիքի ու սանձարձակութիւնների պատրուակ դարձնելու համար (հմմտ. Ա Պետ. Բ 16): Իրաւի, յարութեան շնորհի ժառանգորդ լինելը արտայայտւում է ապրելակերպի, գործերի, ո՛չ միայն անձնական ու ընտանեկան, այլեւ հանրութեանը, ազգին, մարդկութեանը բերած օգտակարութեան ու ներդրումի մէջ: Այս ճանապարհով է պայծառանում եւ արդիւնաւորւում հաւատքը, առատանում յոյսը, հաստատւում եղբայրասիրութիւնն ու միասնաբար առաջընթացի ուղին:

Քրիստոսի չարչարանքներն ու յարութիւնը յանուն մեզ, յանուն ողջ մարդկութեան` աստուածային անսահման սիրոյ արտայայտութիւնն են: «Նա մեռաւ բոլորի համար, որպէսզի նրանք, որ կենդանի են, միայն իրենց համար կենդանի չլինեն, այլեւ Նրա համար, ով մեռաւ եւ յարութիւն առաւ իրենց համար (Բ Կորնթ. 5.15): Սէրը, սիրելինե՛ր, անձնակենտրոն չէ, իրենը չի փնտռում (Ա Կորնթ. 13.5), արտայայտւում է միմեանց հանդէպ նուիրուածութեամբ եւ հիմքն է ծաղկումի, վերելքի, յարութեան: Այս է այն կարեւոր պատգամը, որ Փրկիչ մեր Տէրը փոխանցում է մարդկանց Իր օրինակով: Տիրոջ յարութիւնն ինքնին համընդհանրութեան, հաւաքականութեան ու միաբանութեան խորհուրդն է բերում աշխարհին: Քրիստոս բոլորին բերեց իր ծառայութիւնը, այդպէս էլ մենք ապրենք միմեանց հանդէպ սիրոյ ու ծառայանուիրումի, նախանձախնդրութեան ու յանձնառութեան ոգով: Այս գիտակցութեամբ է, որ ի զօրու պիտի լինենք դիմագրաւելու մեր պետական ու համազգային կեանքի դժուարութիւնները, լուծել մեր առջեւ ծառացած խնդիրները, ամրապնդել ընտանիքները, անսասան պաշտպանել ու շէնացնել մեր հայրենիքը, աշխարհասփիւռ ազգային մեր կեանքը: Մեր ժողովուրդը, որ ընդունել է Քրիստոսին որպէս իր Փրկչի, եւ առ Տէրը սիրով ու հաւատարմութեամբ յառնել պատմութեան արհաւիրքներից, այսօր էլ այդ հաւատքով, այդ զօրութեամբ պիտի շարունակի կերտել իր յաղթանակներն ու ձեռքբերումները: Արդ, սիրելինե՛ր, Քրիստոսի էջքով սրբագործուած մեր երկրում եւ համայն մեր կեանքում յարատեւ պահենք Քրիստոսի յարութեան լոյսն ու զօրութիւնը եւ շարունակ նորոգուենք մեր Փրկչի պարգեւած շնորհով: Այսպէս մենք կարող կը լինենք միասնաբար ընթանալ դէպի հզօր հայրենիքի նորակերտում, դէպի նոր հորիզոնները մեր կեանքի` փաստելով, որ մենք Քրիստոսով յարուցեալ ժողովուրդ ենք, Քրիստոսի ժողովուրդն ենք, Աստծոյ սեփական ժողովուրդն ենք:

Մեր Տէր եւ Փրկիչ Յիսուս Քրիստոսի Յարութեան ցնծալի աւետիսով ողջունում ենք առաքելական մեր սուրբ եկեղեցու նուիրապետական աթոռներու գահակալները` ՆՍՕՏՏ Արամ Ա. Մեծի Տանն Կիլիկիոյ կաթողիկոսին, Երուսաղէմի հայոց պատրիարք ամենապատիւ Տ. Նուրհան արքեպիսկոպոս Մանուկեանին, Կոստանդնուպոլսի հայոց պատրիարքական ընդհանուր փոխանորդ Գերաշնորհ Տ. Արամ արքեպիսկոպոս Աթեշեանին, քոյր եկեղեցիների հոգեւոր պետերին` իրենց ծառայութեան արգասաւորման մաղթանքով: Հայրապետական օրհնութեամբ ողջունում եւ ամենայն բարեաց մեր մաղթանքներն ենք բերում Հայաստանի Հանրապետութեան նախագահ տիար Արմէն Սարգսեանին եւ Հայաստանի Հանրապետութեան վարչապետ տիար Նիկոլ Փաշինեանին: Ողջոյն ենք յղում Արցախի Հանրապետութեան նախագահ տիար Բակօ Սահակեանին, հայոց պետական աւագանիին: Սուրբ Յարութեան շնորհաբեր տօնի առիթով մեր բարեմաղթանքներն ենք բերում Հայաստանում հաւատարմագրուած դիւանագիտական առաքելութիւնների ներկայացուցիչներին: Հայրապետական մեր սէրն ու օրհնութիւնը` մեր սուրբ եկեղեցու հոգեւոր դասին եւ համայն հաւատաւոր մեր ժողովրդին:

Սուրբ յարութեան շնորհառատ այս օրը աղօթում ենք, որ աշխարհում հրաշագործեն Փրկչի յարութեան շնորհները, մարդիկ նորոգուեն կեանքի, խաղաղութեան, միասնութեան բարի ձգտումներով ու իրագործումներով եւ լինեն մէկ ընտանիք աստուածային օրհնութեան ներքոյ: Ընտանիքին նուիրուած այս տարում վերստին հայցում ենք, որ Քրիստոսի յարութեան լոյսով պայծառանան ու ամրանան ընտանեկան մեր հարկերը` լի սիրով, համերաշխութեամբ ու երջանկութեամբ: Թող Տէրն Իր անսահման սիրոյ մէջ պահպանի մեր ժողովրդին եւ անշէջ պահի յարութեան լոյսն ու ուրախութիւնը մեր սրտերում, մեր երկրում ու համայն աշխարհում:

Թող մեր Տիրոջ` Յիսուս Քրիստոսի շնորհը, սէրը եւ խաղաղութիւնը լինեն մեզ հետ եւ ամէնքի. ամէն:

Քրիստոս յարեաւ ի մեռելոց,
Օրհնեալ է յարութիւնն Քրիստոսի

ԳԱՐԵԳԻՆ Բ. ԿԱԹՈՂԻԿՈՍ
ԱՄԵՆԱՅՆ ՀԱՅՈՑ

21/04/2019, 07:10