Cerca

Vatican News
Պոլսոյ Հայոց Պատրիարք Ամենապատիւ Տ. Մեսրոպ Ս. Արք. Մութաֆեան Պոլսոյ Հայոց Պատրիարք Ամենապատիւ Տ. Մեսրոպ Ս. Արք. Մութաֆեան 

Վախճանած է Թուրքիոյ Հայոց Պատրիար\ք Ամենապատիւ Տ. Մեսրոպ Ս. Արք. Մութաֆեան

Այս մասին կը հաղորդէ Պոլսոյ «Ժամանակ» օրաթերթը։

Պոլսոյ Սուրբ Փրկիչ Ազգային հիւանդանոցին մէջ, այսօր կէսօրին, վախճանած է Թուրքիոյ Հայոց Պատրիարք Ամենապատիւ Տ. Մեսրոպ Ս. Արք. Մութաֆեան։ Այս մասին կը հաղորդէ Պոլսոյ «Ժամանակ» օրաթերթը։

«Ինչպէս ծանօթ է, Ամենապատիւ Սրբազան Պատրիարք Հայրը՝ աւելի քան տասն տարիէ ի վեր՝ կը տառապէր «տեմանս»է եւ երկար ժամանակէ ի վեր արդէն բուսական կեանք կ՚ապրէր։ Բօթը կայծակնային արագութեամբ տարածուած է եւ խոր ցաւ պատճառած է ամբողջ հայաշխարհէն, մանաւանդ պոլսահայ համայնքէն ներս։ Նորին Ամենապատւութիւնը 1998 թուականին բարձրացած էր Պոլսոյ Պատրիարքական Աթոռը եւ դժբախտաբար իր գահակալութեան շրջանը բաւական կարճ եղած էր՝ անբուժելի հիւանդութեան հետեւանքով։ Կը տեղեկանանք, որ Պատրիարքական Ընդհանուր Փոխանորդ Տ. Արամ Արք. Աթէշեան այս կապակցութեամբ անմիջապէս կապ հաստատած է Մայր Աթոռ Սուրբ Էջմիածինի հետ եւ տեղեակ պահած՝ Ամենայն Հայոց Տ.Տ. Գարեգին Բ. Կաթողիկոսը։ Սուրբ Փրկիչ Ազգային հիւանդանոցի հոգաբարձութիւնն ալ, այս իրադարձութեան կապակցութեամբ շարժման անցած է, որպէսզի Նորին Ամենապատւութեան վախճանման զուգահեռ անհրաժեշտ բոլոր կարգադրութիւնները կատարուին անթերիօրէն»,- կը հաղորդէ թերթը։

Ըստ աղբիւրին՝ Սուրբ Փրկիչ Ազգային հիւանդանոցի տեղեկութիւններով՝ Նորին Ամենապատւութիւնը ունեցած է անակնկալ սրտի տագնապ մը, որուն պատճառով կանգ առած է անոր սիրտը։

Մեսրոպ արքեպիսկոպոս Մութաֆեանը ծնած է 1956 թուականին, Պոլսոյ մէջ: Նախնական կրթութիւնը ստացած է Պոլսոյ Եսայեան Վարժարանէն ներս։ 1968 թուականին ընդունուած  է Պոլսոյ Անգլիկան վարժարանը եւ 1973 թուականին աւարտած այն։

1973-1975 թուականներուն ուսանած է Շթութկարթի Ամերիկեան քոլեճի գեղարուեստի եւ պատմութեան բաժնէն ներս։

1975-1979 թուականներուն ուսումը շարունակած է ԱՄՆ-ի Թենըսի նահանգի Մեմփիսի պետական համալսարանին մէջ` հետեւելով փիլիսոփայութեան դասընթացներուն, մասնակցելով նաեւ Թենըսի նահանգի Էփիսքըփըլ (Անգլիկան) թեմի քահանաներու համար յատուկ աստուածաբանութեան եւ եկեղեցագիտութեան դասընթացներուն։

1977 թուականին Բերայի Սուրբ Երրորդութիւն եկեղեցւոյ մէջ ձեռնադրուած է սարկաւագ։ Նոյն թուականին Բերայի Սուրբ Երրորդութիւն եկեղեցւոյ մէջ ձեռնադրուած է կուսակրօն քահանայ `վերանուանուելով Մեսրոպ աբեղայ։

1979-1982 թուականներուն ուսումը շարունակած է Երուսաղէմի համալսարանին մէջ՝ ուսանելով սուրբգրային հնագիտութիւն, միաժամանակ դասաւանդած է Երուսաղէմի Ժառանգաւորաց վարժարանէն ներս` Հին Կտակարանի ներածութիւն եւ անգլերէն։

1982 թուականին Երուսաղէմի մէջ ստանձնած է մագիստրոսի գիտական աստիճան։ Այնուհետեւ վերադարձած է Պոլիս եւ աշխատանքի անցած Կոստանդնուպոլսոյ հայոց պատրիարքարանէն ներս՝ որպէս քարտուղար։

1983 թուականին պաշտպանած է վարդապետական թէզ «Սուրբ Գիրք եւ աւանդութիւն» թեմայով։

1986 թուականին պաշտպանած է ծայրագոյն վարդապետական թէզ եւ ստացած ծայրագոյն վարդապետութեան աստիճան։

1988-1989 թուականներուն ուսանած է Հռոմի Ս. Թովմա Աքիւինացիի անուան համալսարանին մէջ, եւ 1990 թուականին նշանակուած է Պոլսոյ պատրիարքարանի կրօնական ժողովներու ատենապետ։

1990 թուականին նշանակուած է Միջեկեղեցական յարաբերութիւններու պատրիարքական փոխանորդ։

1998 թուականի 14 հոկտեմբերին Պատգամաւորական ժողովի կողմէ ընտրուած է Կ. Պոլսոյ հայոց պատրիարք։

2003 թուականին Ուաշինկթընի Սենթ Մերի համալսարանի կողմէ արժանանցած է պատուաւոր դոկտորի կոչման։

2008 թուականէն պատրիարքը կորսնցուցած էր յիշողութիւնը, տառապած է անբուժելի հիւանդութեամբ եւ կը գտնուէր հիւանդանոցը: 

Քաղուած «Եռագոյն»էն եւ «Արեւելք»էն

08/03/2019, 12:34