Եուհաննա Ժ. Պատրիարքը Բարթողիմէոս պատրիարքին կոչ կ՛ուղղէ չաճապարելու
Անտիոքի յոյն ուղղափառ Եուհաննա Ժ. պատրիարքը հրապարակեց Պոլսոյ յոյն ուղղափառ տիեզերական պատրիարք Բարթողիմէոսին ուղղուած բաց նամակ մը` նշելով, թէ տեղեակ է Ուքրանիոյ մէջ ուղղափառ եկեղեցւոյ վերաբերեալ իրադարձութիւններէն, եւ մտահոգութիւն յայտնեց «ո՛չ միայն ուղղափառ եկեղեցւոյ մէջ յառաջացած պառակտումին, այլ նաեւ տեղւոյն ուղղափառ եկեղեցւոյ կարծիքի անտեսման նկատմամբ»:
Ան Պոլսոյ յոյն ուղղափառ պատրիարքին կոչ ուղղեց` «չաճապարելու եւ ուղղափառ անկախ եկեղեցիներու համաձայնութեան չարժանացած որեւէ որոշում տալու չշտապելու, որովհետեւ անտրամաբանական է պառակտումի մը վերջ տալ` ի վնաս ուղղափառ աշխարհի միասնականութեան»:
Եուհաննա Ժ. պատրիարքը նշեց. «Եկեղեցւոյ խաղաղութեան, միութեան եւ ներկայ մեր աշխարհին մէջ ուղղափառ վկայութեան համար օգտակար է սառեցնել այդ որոշումները եւ յետաձգել անոնց գործադրութիւնը»:
Ան նաեւ Պոլսոյ յոյն ուղղափառ պատրիաքին կոչ ուղղեց ուղղափառ եկեղեցիներու ղեկավարները հրաւիրելու խորհրդակցութեան` «մեր եկեղեցիին խնայելու համար այն վտանգները, որոնք ո՛չ Ուքրանիոյ, ո՛չ ալ ուղղափառ աշխարհին մէջ խաղաղութեան պիտի առաջնորդեն»:
Քաղուած Ազդակ օրաթերթէն:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ