Սոչիի հայ կաթողիկէ համայնքը նոր ժողովրդապետ ունի
2018թ. դեկտեմբերի 2-ին Մոսկուայի և հարակից բնակավայրերի հայ կաթողիկէների ժողովրդապետ, Առաջնորդական Փոխանորդ Գերհ. Հ. Պետրոս ծ. վրդ. Եսայեանը Ադլեր քաղաքի հայ կաթողիկէ համայնքին ներկայացրեց Սոչիի շրջանի հայ կաթողիկէների նորանշանակ ժողովրդապետ Հոգշն. Հ. Ռաֆայել վրդ. Կրավչիկին: Հ. Ռաֆայելը նախկինում հոգևոր ծառայութիւն է կատարել Ռուսաստանի Վինյով քաղաքում, ապա՝ Հայաստանի հայ կաթողիկէ համայնքներում (Աշոցքի ժողովրդապետ՝ 2015-2017թթ.), 2017թ. սկսել Հայաստանի, Վրաստանի և Ռուսաստանի հայ կաթողիկէների եկեղեցական դատական ատեանի հիմնադրման գործընթացը, իսկ 2018թ. նոյեմբերին Հ. Ռաֆայէլը նշանակուեց ծառայութեան Ռուսաստանի հարաւային շրջանում՝ որպէս Սոչիի հայ կաթողիկէների ժողովրդապետ:
Հ. Ռաֆայէլի հովութեան ներքոյ գտնւում են այսպէս կոչուած Մեծ Սոչիի տարածքի մի քանի հայաշատ քաղաքներ, որոնցից ամենահայաշատը Ադլերն է, այդ պատճառով էլ որոշուել է Ադլերում հիմնել մնայուն ժողովրդապետութեան կենտրոնը: Տեղի լատին ծէսի կաթողիկէ եպիսկոպոսը սիրով օգտագործման իրաւունքով հայ կաթողիկէ ժողովրդապետութեանն է յատկացրել մի յարմարաւետ շինութիւն, որտեղ կա քահանայատուն և մատուռ: Սոչիի քաղաքներում հայ կաթողիկէ եկեղեցիներ դեռևս չկան: Իսկ բուն Սոչիում հայ կաթողիկէ ծէսով Սուրբ Պատարագը և միւս արարողութիւնները կատարւում են լատին ծէսի կաթողիկէ եկեղեցում:
Առաջնորդական Փոխանորդ Հ. Պետրոս ծ.վրդ. Եսայեանի ջանքերով համագործակցութիւնը և եղբայրական յարաբերութիւնները Ռուսաստանի լատին ծէսի կաթողիկէ առաջնորդների հետ մտել է նոր և հեռանկարային փուլ: Հ. Պետրոսը նորանշանակ ժողովրդապետին ներկայացնելիս՝ դրուատանքի և գնահատանքի խօսքով է արտայայտուել նաև Սոչիի հայերի համար նախկինում ծառայող լատին ծէսի վարդապետների: Միասնական ոգով ծառայութեանը, անշուշտ, կշարունակի նաև Սոչիի նոր ժողովրդապետ Հ. Ռաֆայելը՝ փոխադարձաբար վայելելով յարգանքն ու սերը հայկական ծէսի և հայ ժողովրդի հանդեպ՝ լատին ծէսի առաջնորդների կողմից:
Հ. Պետրոսը շնորհակալութիւն յայտնեց նաև Կրասնոդարի շրջանի հայ կաթողիկէների ժողովրդապետ Հոգշն. Հ. Սերգեյ վրդ. Բաբաջանյանին, ով չնայած իր ծանրաբեռնուածութիւնը ժամանակ էր գտնում ջանասիրութեամբ հոգալու նաև Սոչիի հայ կաթողիկէների հոգևոր կարիքները:
Աստուածային նախախնամութեամբ, այսպիսով, Ռուսաստանի հայ կաթողիկէ համայնքներում արդեն ծառայում են հինգ հայածէս հոգևորականներ. երեքը՝ Մոսկվայում, Վենյովում և Ռուսաստանի կենտրոնական այլ բնակավայրերում և երկուսը՝ Ռուսաստանի հարաւային շրջաններում: Առայժմ մնայուն սպասաւորներ չկան Ռուսաստանի հիւսիսում, որտեղ հայ կաթողիկէների թիւը ևս քիչ չէ:
Քաղուած Հայ Կաթողիկէ առաջնորդարանի կայքէջէն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ