Cerca

Vatican News
Օծուեց Նովոսիբիրսկի նորակառոյց եկեղեցին Օծուեց Նովոսիբիրսկի նորակառոյց եկեղեցին 

Ամենայն Հայոց Կաթողիկոսի ձեռամբ օծուեց Նովոսիբիրսկի նորակառոյց եկեղեցին

Հաւատքն է մեր զօրութեան աղբիւրը, հաւատքով ենք մենք միաբան, հաւատքով ենք մենք յաղթական:

Նոյեմբերի 17-ին Ռուսաստանի Դաշնութեան Նովոսիբիրսկ քաղաքում, հանդիսապետութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, տեղի ունեցաւ հայկական նորակառոյց եկեղեցու օծման արարողութիւնը:

Առաւօտեան Նորին Սրբութիւնն ուղեկցութեամբ Նովոսիբիրսկի նահանգապետ Անդրեյ Տրաւնիկովի, Ռուսաստանի եւ Նոր Նախիջեւանի հայոց թեմի առաջնորդ Գերաշնորհ Տ. Եզրաս արքեպիսկոպոս Ներսիսեանի եւ հայրապետական շքախմբի անդամների ժամանեց եկեղեցի, ուր ազգային տարազներով երիտասարդներ Ամենայն Հայոց Կաթողիկոսին մատուցեցին աւանդական աղ ու հացը: Այնուհետեւ եկեղեցու հոգեւոր հովիւ Արժանապատիւ Տ. Գրիգոր քահանայ Բեկնազարեանը ներկայացրեց դեռեւս 2008 թուականին հիմնադրուած տաճարի կառուցման պատմութիւնը, քարոզչական-կրթական գործունէութեան իրականացման համար ստեղծուած պայմանները:

Եկեղեցու օծման արարողութեանը ներկայ էին Նովոսիբիրսկի նահանգապետը, Նովոսիբիրսկի քաղաքապետ Անատոլի Լոկոտը, Ռուս Ուղղափառ Եկեղեցու Նովոսիբիրսկի եւ Բերդսկի միտրոպոլիտ Տիխոնը, թեմի հոգեւոր սպասաւորներ, քրիստոնէական եւ այլ կրօնական յարանուանութիւնների, մարզային եւ քաղաքային իշխանութիւնների ներկայացուցիչներ եւ մարզի տարբեր ծայրերից այս ուրախալի առիթով ժամանած բազում հայորդիներ:

Հոգեպարար արարողութեան ընթացքում Ամենայն Հայոց Կաթողիկոսը, առընթերակցութեամբ Գերաշնորհ Տ. Եզրաս արքեպիսկոպոս Ներսիսեանի եւ Գերաշնորհ Տ. Մուշեղ եպիսկոպոս Բաբայեանի, կատարեց եկեղեցու օծման արարողութիւնը` նորակառոյց տաճարը կոչելով Սուրբ Աստուածածնի անունով:

Այնուհետեւ Հայոց Հայրապետն իր հայրական պատգամն ու օրհնութիւնը բերեց Նովոսիբիրսկի հայ համայնքի կեանքում կարեւոր այս տօնախմբութեան մասնակիցներին:  «…Տօն է այսօր, քանզի բացուեցին Աստծոյ տան դռները, որտեղ մեր ժողովրդի զաւակունք Արարչի հետ հաղորդակցութեամբ Տիրոջն են ներկայացնելու իրենց աղօթքն ու խնդրանքները, իրենց գոհաբանութիւնը: Մեր ժողովուրդը հազարամեակների իր պատմութեան ընթացքին բազում փորձութիւններ ու դժուարութիւններ կրեց, վերապրեց Հայոց Ցեղասպանութիւնը, յարութիւն առաւ եւ յարատեւեց իբրեւ ստեղծագործ ժողովուրդ, որովհետեւ փարուեց իր Եկեղեցուն, որը մշտապէս խնամել, միաւորել, ներշնչել եւ առաջնորդել է հայոց ազգին փրկութեան ճանապարհով:

Հաւատքն է մեր զօրութեան աղբիւրը, հաւատքով ենք մենք միաբան,  հաւատքով ենք մենք յաղթական: Արդարեւ, անհնար է ոչնչացնել մի ժողովրդի, որը կերտել է հարուստ հոգեւոր արժեհամակարգ, մի ժողովրդի,  որը չի  վարանել երբեք իրեն զոհաբերել յանուն Աստծոյ եւ հայրենիքի: Մեր ժողովուրդը քրիստոնէական հաւատքով լուսաւորուած իր լինելիութեան ողջ ընթացքում ձգտել է իր կեանքը խարսխել Աւետարանի պատուիրանների վրայ` իր շուրջբոլորը լցնելով հոգեւոր արժէքներով, որոնք այսօր, անտարակոյս, համամարդկային մշակոյթի հարուստ ժառանգութեան մաս են կազմում:

Ճշմարիտ է ասուած՝ ով մոռանում է իր պատմութիւնը, զուրկ է ապագայից եւ անխուսափելիօրէն դատապարտուած է կորստեան: Այս գիտակցութեամբ ռուսաստանաբնակ հաւատաւոր մեր զաւակները կառուցեցին եկեղեցիներ, հաստատեցին դպրոցներ, նուիրուեցին հոգեւոր կեանքի վերարթնութեանը, որպէսզի ամուր պահեն առ Աստուած հաւատը եւ իրենց զաւակներին հաղորդ դարձնեն ազգային, հոգեւոր մեր դարաւոր անանց արժէքներին», – ասաց Վեհափառ Հայրապետը:

Նորին Սրբութիւնը խօսեց Ռուսաստանում տարբեր ազգութիւնների եւ կրօնների, նրանց աւանդութիւնների ու սովորոյթների հանդէպ տիրապետող յարգանքի մթնոլորտի մասին` անդրադառնալով այն իրողութեանը, որ ռուսաստանաբնակ հայորդիները եւս իշխանութիւնների հոգածու ուշադրութեան շնորհիւ, նաեւ Ռուս Ուղղափառ Եկեղեցու եղբայրական եւ ջերմ վերաբերմունքի պայմաններում հնարաւորութիւն ունեն Ռուսաստանի եւ Նոր Նախիջեւանի հայոց թեմի խնամակալութեան ներքոյ լիարժէքօրէն կազմակերպելու իրենց ազգային-հոգեւոր կեանքը:

 Ամենայն Հայոց Կաթողիկոսը հայրապետական իր յորդորն ուղղեց հայորդիներին`շարունակելու աւետարանական սիրոյ պատգամով արարել  եւ զօրացնել ազգային-եկեղեցական կեանքը, ապրել որպէս արժանապատիւ ու օրինապահ քաղաքացիներ եւ իրենց օգտաշատ գործունէութեամբ յաւելել նաեւ փառքը մեր ժողովրդի:

Եկեղեցու օծման առիթով Նորին Սրբութիւնն իր բարձր գնահատանքը բերեց Նովոսիբիրսկի մարզային եւ քաղաքային իշխանութիւններին հայ համայնքի նկատմամբ դսրեւորած մշտական ուշադիր վերաբերմունքի համար:

Հայոց Հովուապետն իր բարեմաղթանքներն ուղղեց միտրոպոլիտ Տիխոնին` նրա ներկայութիւնը նկատելով իբրեւ խօսուն վկայութիւն Հայ Առաքելական եւ Ռուս Ուղղափառ Եկեղեցիների միջեւ առկայ եղբայրական ջերմ կապերի:

Նորին Սրբութիւնը իր օրհնութիւնը եւ բարձր գնահատանքը բերեց թեմակալ առաջնորդին եւ թեմի հոգեւոր դասին, ովքեր նախանձախնդրօրէն ծառայում են ի խնդիր Ռուսաստանի Դաշնութիւնում մեր ժողովրդի հոգեւոր կեանքի շինութեան ու պայծառութեան:

Նովոսիբիրսկի մարզում բնակուող հայորդիներին Վեհափառ Հայրապետը մաղթեց  Բարձրեալի ամենառատ ողորմութեամբ խաղաղութիւն եւ բարօրութիւն` աղօթելով, որ ոչ մի դժուարութիւն եւ փորձութիւն չշեղի նրանց՝ հաւատն ու սէրը, ազգային սրբութիւնները պահպանելու սրբազան ձգտումից, իրենց շուրջը գեղեցիկն ու բարին արարելուց:

 Ամենայն Հայոց Կաթողիկոսը հայցեց Երկնաւորին Իր մշտական օրհնութեան ներքոյ առաջընթացի ու պայծառութեան մէջ պահել ու պահպանել Նովոսիբիրսկի մարզը եւ նրա բարեսէր բնակիչներին, ամուր ու անսասան բարեկամութիւն պարգեւել Հայաստանի եւ Ռուսաստանի ժողովուրդներին:

Արարողութեան աւարտին Նորին Սրբութիւնը նորաօծ տաճարին ընծայեց Սուրբ Ծննդեան սրբապատկեր, իսկ նորակառոյց եկեղեցու բարերար, Նովոսիբիրսկի հայ համայնքի ղեկավար Կ’ոլեայ Կուլիջանեանին շնորհեց Հայաստանեայց Առաքելական Սուրբ Եկեղեցու «Սուրբ Գրիգոր Լուսաւորիչ» պատուոյ բարձրագոյն շքանշան: Հայրապետական օրհնութեան գրեր յանձնուեցին նաեւ եկեղեցու կառուցմանը իրենց աջակցութիւնը բերած մի շարք անձանց:

Նորին Սրբութիւնը Նովոսիբիրսկի եւ Բերդսկի միտրոպոլիտ Տիխոնին ընծայեց պանակէ` առիթ ընծայելով վերջինիս իր շնորհաւորանքները, ջերմ զգացումներն ու բարեմաղթանքներն ուղղելու ներկաներին մարզի հայ համայնքի կեանքում կարեւոր այս իրադարձութեան առիթով:

Արարողութիւնն ամփոփուեց Հայրապետի «Պահպանիչ» աղօթքով, որից յետոյ Նորին Սրբութիւնն իր օրհնութիւնը բերեց եկեղեցու շրջափակում հաւաքուած ժողովրդին` բոլորին ընծայելով խաչեր` ի նշան Սուրբ Էջմիածնի օրհնութեան:

Նոյն օրը ի պատիւ Ամենայն Հայոց Կաթողիկոսի Նովոսիբիրսկի նահանգապետի նստավայրում տեղի ունեցաւ պաշտօնական ընդունելութիւն:

Վեհափառ Հայրապետի այցը Նովոսիբիրսկ եզրափակուեց հայ համայնքի ներկայացուցիչների հետ առանձին հանդիպմամբ, որտեղ վերստին Նորին Սրբութիւնն իր օրհնութիւնն ու յորդորները բերեց հայորդիներին:

Քաղուած «Հայերն Այսօր»էն 

19/11/2018, 08:16