6 Մայիսին Վատիկանի Զուիցերական պահակագունդը կ՛ունենայ 33 նոր անդամներ։
Ռոպէր Աթթարեան - Վատիկան
Ի յիշատակ եւ ոգեկոչում՝ 6 Մայիս 1527-ին, Հռոմի թալանումի ընթացքին զուիցերացի 147 պահակներու զոհաբերումին, ի պաշտպանութիւն Կղեմես Է Պապին, յառաջիկայ 6 մայիս 2018-ին յետմիջօրէին, առաքելական պալատի ''Սան Տամազօ'' ներքնափակին մէջ տեղի կ՛ունենայ Վատիկանի Զուիցերական պահակագունդի 33 նոր անդամներու երդման արարողութիւնը, որ կը նախագահէ Պետական Քարտուղարութեան տեղակալ` գերապայծառ Փաոլօ Պորճա, ի ներկայութեան Զուիցերական կառավարական, եկեղեցական եւ դիւանագիտական իշխանութիւններու ներկայացուցիչներուն։
Երդման արարողութենէն առաջ 6 մայիսի առաւօտեան 7,30-ին, Սուրբ Պետրոսի Պազիլիքային մէջ նախատեսուած է նաեւ Սուրբ Պատարագ՝ զոր կը գլխաւորէ Վատիկանի Պետական Քարտուղարը կարդինալ Փիեթրօ Փարոլին։
Յայտնենք թէ Վատիկանը` աշխարհի ամենափոքր պետութիւնն է սակայն ունի աշխարհի ամենահին բանակներէն մին` Զուիցերական պահակագունդը, որուն պարտականութիւնն է երաշխաւորել Սրբազան Քահանայապետին անմիջական պաշտպանութիւնը, հսկելով Վատիկանի բոլոր մուտքերուն վրայ։
Զուիցերական պահակագունդին մաս կազմելու համար հարկաւոր է ըլլալ Զուիցերացի քաղաքացի, Կաթողիկէ, Զուիցերական բանակին մէջ ծառայութիւն մատուցել, 18 - 30 տարեկան, ունենալ առ նուազն 174 սմ հասակ, ամուրի, եւ ունենալ ուսման բարձրագոյն վարժարանի վկայական։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
