Святы Пасад далучыўся да пагадненняў па клімаце
Марыя Валодзіна – Vatican News
З далучэннем Святога Пасаду лік бакоў, што падпісалі Канвенцыю, дасягнуў 198 дзяржаў.
У гэты момант нашай гісторыі, адзначаны ўсё больш трывожнымі канфліктамі, патрэбна кансалідаваць нашы высілкі ў інтарэсах інтэгральнай экалогіі, якая, разам з кліматам, рызыкуе апынуцца ў цені, - заявіў Дзяржаўны сакратар П'етра Паралін на сустрэчы, якая адбылася ў Ватыкане 4 кастрычніка 2022 года. У гэты дзень Касцёл згадвае святога Францішка Асізскага, які натхніў Папу на клопат пра наш агульны дом.
Іерарх нагадаў, што энцыкліка Laudato si’ заклікае да супрацоўніцтва “на розных узроўнях” паміж краінамі і рознымі кампанентамі міжнароднай супольнасці (арганізацыямі, мясцовымі органамі ўлады, прыватным сектарам, навукоўцамі, грамадзянскай супольнасцю), і самае галоўнае, паміж людзьмі розных пакаленняў. Таму што “калі мы кажам пра клопат аб агульным доме”, мы павінны клапаціцца пра тых, хто будзе жыць у ім у будучыні.
Кардынал Паралін нагадаў пра абавязак Святога Пасада дасягнуць нулявых выкідаў вугляроду да 2050 года і спрыяць пашырэнню экалагічнай адукацыі, якая зможа стымуляваць “новы стыль жыцця, заснаваны на развіцці і ўстойлівасці, братэрстве і супрацоўніцтве паміж чалавекам і навакольным асяроддзем”.
Сустрэча была арганізавана Дзяржаўным сакратарыятам, Папскай Акадэміяй навук і Папскай Акадэміяй грамадскіх навук. Акрамя Дзяржсакратара ў ёй прынялі ўдзел кардыналы Чэрны і Вергес, а таксама арцыбіскуп Галахер, міністры замежных спраў і прадстаўнікі ААН. Яна прайшла напярэдадні Канферэнцыі бакоў COP27, што мае адбыцца ў Шарм-эль-Шэйху з 6 па 18 лістапада 2022 году.
