У Ватыкане за зачыненымі дзвярыма сабраліся каля 200 кардыналаў
Аляксандр Амяльчэня – Vatican News
Каля 200 з 226 чальцоў Калегіі ўдзельнічаюць у дыскусіі на тэму рэформы Рымскай курыі, яе рэалізацыі і эфектаў. Гэта, верагодна, самая шырока прадстаўленая сустрэча Францішка з Калегіяй кардыналаў.
Praedicate Evangelium уступіла ў сілу 5 чэрвеня 2022 года, ва ўрачыстасць Пяцідзясятніцы. Тэкст змяшчае і сістэматызуе многія аспекты рэформы, рэалізаваныя ў апошнія некалькі гадоў. Яны былі вывучаны і сфармуляваны Радай кардыналаў, створанай Францішкам на першым этапе яго пантыфікату. Канстытуцыя ўключыла і новаўвядзенні, у тым ліку аб'яднанне і змену назваў структур Святога Пасаду. Аднак перш за ўсё дакумент, як вынікае з самой яго назвы, фарміруе Рымскую курыю ў больш місіянерскім напрамку, каб яна стала структурай, што служыць партыкулярным Касцёлам і евангелізацыі.
