Фонд здароўя Ватыкана: у падставе працы – салідарнасць

Перш за ўсё, нагадаў мансеньёр Луіджы Місто, сістэма аховы здароўя Ватыкана аказвае медыцынскія паслугі супрацоўнікам Рымскай курыі, Губернатарата Дзяржавы Ватыкан і ўстаноў, адміністрацыйнае кіраванне якімі ажыццяўляе непасрэдна Святы Пасад.

Па яго словах, Фонд адказвае на патрэбу ў салідарнасці паміж усімі супрацоўнікамі Святога Пасаду і Дзяржавы Ватыкан. “Гаворка ідзе пра патрэбу, якая грунтуецца на сацыяльным вучэнні Каталіцкага Касцёла, для якога рэгулюючым прынцыпам грамадскага жыцця з’яўляюцца стасункі ўзаемнай любові і дапамогі. Святы Пасад і Дзяржава Ватыкан – гэта працоўная супольнасць, якая першай павінна сведчыць аб гэтым на практыцы”, - сказаў старшыня Фонду аховы здароўя.

Акрамя таго, мансеньёр Місто прызнаўся, што кіраўніцтва Фонду пастаянна дбае пра эфектыўнасць сваёй працы. Менавіта таму ў 2017 г., на заканчэнне пяцігадовага перыяду, які характарызаваўся працяглай дынамікай росту расходаў, новая Адміністрацыйная рада распачала працэс рэформы, якая грунтуецца на крытэрыях эфектыўнасці, празрыстасці і разважлівага карыстання наяўнымі фінансавымі рэсурсамі для гарантавання ўстойлівасці Фонду, не ўплываючы на якасць медыцынскіх паслуг.

“Хвароба – гэта экзістэнцыяльная перыферыя, праз якую ўсе, раней ці пазней, непасрэдна ці праз блізкага чалавека, праходзяць. Таму Фонд, надаючы належную ўвагу аспектам эканамічнай устойлівасці, павінен абавязкова і заўсёды ў цэнтры ставіць хворага чалавека, даючы яму адчуць увесь клопат і пяшчоту, у якіх ён мае патрэбу”, - падкрэсліў італьянскі святар.