Пошук

Vatican News
На ўручэнні “Прэміі Ратцынгера”. Архіўнае фота На ўручэнні “Прэміі Ратцынгера”. Архіўнае фота 

“Прэмію Ратцынгера” атрымаюць канадзец і буркініец

Міжнародная знакамітасць – Чарльз Маргрэйв Тэйлар і афрыканскі тэолаг Поль Бэрэ сталі лаўрэатамі сёлетняй “Прэміі Ратцынгера”. Іх прапанаваў Навуковы камітэт узнагароды, а зацвердзіў Францішак.

87-гадовы канадзец Тэйлар найбольш вядомы сваімі даследаваннямі, якія тычацца камунітарызму, касмапалітызму і ўзаемасувязі паміж рэлігіяй і сучаснасцю, у прыватнасці тэмы секулярызацыі, у якой ён лічыцца адным з самых аўтарытэтных экспертаў. Ён – католік, удзельнічаў у ватыканскай ініцыятыве “Падворак язычнікаў”.

53-гадовы Поль Бэрэ, езуіт, родам з Буркіна-Фасо. Ён ініцыяваў некалькі важных праектаў па развіцці тэалогіі ў Афрыцы, працаваў экспертам на некалькіх Сінодах Біскупаў і быў кансультантам Генеральнага Сакратарыята Сінода. З’яўляецца членам Міжнароднай камісіі па дыялогу з Англіканскай Царквой, розных аб’яднанняў тэолагаў, у тым ліку, Асацыяцыі афрыканскіх тэолагаў і Панаафрыканскай асацыяцыі каталіцкіх экзегетаў.

У навуковы камітэт “Прэміі імя Ёзэфа Ратцынгера” ўваходзяць кардыналы Анджэла Амата, Курт Кох, Луіс Франсіска Ладарыя, Джанфранка Равазі і біскуп Рудольф Водэрхольцэр, пастыр Рэгенсбургскай дыяцэзіі.

“Ватыканскі фонд імя Ёзэфа Ратцынгера – папы Бэнэдыкта XVI”, які з’яўляецца ініцыятарам узнагароды, устанавіў сам Пантыфік і ахвяраваў у яго даходы ад сваёй літаратурна-тэалагічнай дзейнасці. Падтрымліваюць Фонд і дабрачынцы.

Навіна ў фармаце аўдыё
30 верасня 2019, 12:24