Святы Пасад пракаментаваў прысутнасць на інаўгурацыі Мадуры
“Святы Пасад падтрымлівае дыпламатычныя адносіны з венесуэльскай дзяржавай. Яго дыпламатычная дзейнасць мае сваёй мэтай спрыяць агульнаму дабру, абароне міра і забеспячэнню павагі чалавечай годнасці. Па гэтай прычыне, Святы Пасад вырашыў прысутнічаць на цырымоніі інаўгурацыі Прэзідэнта на ўзроўні Часовага паверанага ў справах Апостальскай нунцыятуры ў Каракасе. Святы Пасад і біскупы краіны працягваюць працаваць разам, каб дапамагчы людзям у Венесуэле, якая пакутуе ад гуманітарных і сацыяльных наступстваў сур’ёзнай сітуацыі, у якой апынуўся народ”, - заявіў выконваючы абавязкі кіраўніка Залы Друку Алесандра Джызоці.
Прэзідэнт Венесуэлы Нікалас Мадура ў мінулы чацвер прынёс прысягу ў якасці Прэзідэнта Венесуэлы на перыяд 2019-2025 гадоў. Цырымонія прайшла ў будынку Вярхоўнага суда краіны, хоць па канстытуцыі павінна была адбыцца перад Нацыянальнай асамблеяй, аднак кантраляваны апазіцыяй парламент адхілены ад удзелу ў палітычным жыцці Венесуэлы.
Папа і яго Дзяржаўны сакратарыят заўсёды заставаліся цвёрдымі прыхільнікамі мірнага і дэмакратычнага рашэння крызісу ў Венесуэле.
Раней кардынал Дзяржсакратар Пьетра Паралін заяўляў, што пасрэдніцтва Касцёла заключаецца ў дапамозе ўсім, без выключэння, заклікаючы кожнага да адказнасці, і крытэрыем тут павінна быць дабро ўсяго народу. Іерарх лічыць, аднак, што ўдзел Святога Пасаду ў гэтым пытанні павінен быць максімальна далікатны ва ўмовах вялікай напружанасці. «Неабходна знайсці мірны і дэмакратычны выхад з гэтай сітуацыі, і спосаб заўсёды аднолькавы: трэба сустракацца і размаўляць, але сур’ёзна, выпрацоўваючы рашэнні”, - падкрэсліў Дзяржсакратар Яго Святасці.
