Cerca

Vatican News
Папа падчас адвэнтавага казання айца Раньера Канталамесы Папа падчас адвэнтавага казання айца Раньера Канталамесы  (Vatican Media)

Францішак выслухаў першае адвэнтавае казанне

Не пакідаць на другім плане асабістыя адносіны з Богам, неабходныя для спакойнага вырашэння жыццёвых праблем, заклікаў айцец Раньера Канталамеса ў сваім першым адвэнтавым казаннем.

Францішак і іерархі Рымскай курыі выслухалі медытацыю прапаведніка Папскага дома раніцай 7 снежня 2018 г. у капліцы “Redemptoris Mater” ватыканскага Апостальскага палаца.

Будучы заклапочанымі абавязкамі, праблемамі і выклікамі, на якія трэба адказаць, “мы рызыкуем згубіць зрок або пакінуць на другім плане” нашы “асабістыя адносіны з Богам” – самае неабходнае “для вырашэння сітуацый і праблем без згубы супакою і цярплівасці”, падкрэсліў італьянскій капуцын.

“Людзі сучаснай эпохі нястомна шукаюць сігналы, якія кажуць пра існаванне жывых і разумных істот на іншых планетах”, у той час як вельмі мала тых, хто шукае і вывучае сігналы жывога Бога, Які стварыў сусвет, увайшоў у яго гісторыю і жыве ў ім, заўважыў законнік.

“Мы маем сапраўднага Жывога пасярод нас, але не звяртаем на Яго ўвагі, шукаючы гіпатэтычных жывых істот, якія, у лепшым выпадку, могуць зрабіць вельмі мала для нас і, вядома, не могуць збавіць ад смерці”

, - зазначыў прапаведнік.

Божы Сын “абяцае падарыць усяго сябе, акрамя той дробязі, пра якую мы Яго просім”. “Хто Яго шукае – знаходзіць; хто стукае – таму Ён адчыняе; а для таго, хто знайшоў Яго аднойчы, усё іншае адыходзіць на другі план”, - нагадаў айцец Канталамеса.

Капуцын звярнуў увагу на тое, што нярэдка ўяўленні людзей аб Богу з’яўляюцца абмежаванымі. “Паміж нашымі ідэямі аб Богу і жывым Богам, існуе такая самая розніца, як паміж небам, намаляваным на паперы, і сапраўдным небам”, - падкрэсліў ён.

Бог – гэта “не абстракцыя, а рэальнасць”. Неабходна разбіць “шкарлупіну нашых ідэй аб Богу” ці “алебастравыя флаконы”, у якіх спрабуем Яго закрыць, каб Яго “духмяны водар” мог выйсці і “напоўніць дом”, заклікаў прапаведнік Папскага дома

“Боскасць – гэта катэгорыя, якая абсалютна адрозніваецца ад любой іншай, якая не можа быць дакладна акрэслена, але толькі абагульнена; пра якую можна казаць толькі з дапамогай аналогій ці супрацьпастаўленняў”

, - дадаў італьянскі капуцын.

Айцец Канталамеса закончыў сваё казанне ўзгадкай пра адзін з самых цёмных момантаў у жыцці св. Францішка Асізскага, калі той убачыў “адхіленні ад першапачатковага ладу жыцця сваіх братоў”, але змог падбадзёрыцца дзякуючы ўпэўненасці ў тым, што “Бог ёсць і гэтага дастаткова”. “Навучымся паўтараць таксама і мы гэтыя простыя словы, калі ў Касцёле ці нашым жыцці знаходзімся ў сітуацыях, падобных да сітуацыі Францішка. Бог ёсць і гэтага дастаткова”, - заклікаў прапаведнік.
 

07 снежня 2018, 11:59