Пошук

Кардынал Пьетра Паралін Кардынал Пьетра Паралін 

Кардынал Дзяржсакратар пра Кітай і католікаў у палітыцы

Дамова паміж Апостальскай Сталіцай і Кітаем была “актам веры”, бо “па-чалавечы здавалася, што для яе заключэння не было вялікіх магчымасцей”, падкрэсліў кардынал Пьетра Паралін.

Бліжэйшы супрацоўнік Папы ўзяў слова падчас цырымоніі ўрачыстага адкрыцця новага акадэмічнага года на Тэалагічным факультэце рэгіёна Эмілія-Раманья (Facoltà teologica dell'Emilia-Romagna). Каментуючы пагадненне з Кітаем, ён зазначыў, што “зараз мэта заключаецца ў тым, каб не было біскупаў, якія не знаходзяцца ў еднасці са Святым Пасадам”.

“Спадзяемся, што дамова будзе добра функцыянаваць і будзе існаваць добрая воля, як з кітайскага боку, так і з нашага, каб ажыццявіліся прадугледжаныя рашэнні. Гэта нялёгка, маючы за плячыма складаныя гады, але шлях, які мы прайшлі разам, умацаваў давер паміж бакамі, нават калі і цяжка пазбавіцца пэўнага ладу мыслення”, - сказаў іерарх.

Гаворачы аб сітуацыі з міграцыяй, кардынал Паралін нагадаў пра важнасць адкрытасці і гасціннасці ў адносінах да людзей, вымушаных пакідаць свае родныя краіны. “Некаторыя палітычныя лідары прызнаюць, што пазіцыя Касцёла і Святога Айца слушная: Касцёл выконваў і выконвае свой абавязак”, - дадаў ён.

Высокі ватыканскі іерарх выказаў занепакоенасць у сувязі з аслабленнем прысутнасці католікаў у палітычнай сферы. “Свет вельмі змяніўся і вяртанне ў мінуўшчыну мне не здаецца магчымым, але думаю, што католікі могуць зрабіць важны ўнёсак у жыццё грамадства, у розныя яго сферы, у тым ліку палітычную. Турбуе той факт, што іх голас стаў ціхім, амаль нячутным”, - сказаў кардынал.

Дзяржсакратар Яго Святасці выказаўся і пра выклікі, якія стаяць перад сучаснымі святарамі. У гэтым кантэксце ён заклікаў пастыраў пазбягаць “геройства” і засяроджвацца на абвяшчэнні Евангелля, каб клопат і ўвага да вернікаў заставаліся іх фундаментальнымі рысамі.

Сёння, як ніколі раней, існуе патрэба ў святарах, здольных з мудрасцю адказваць на пытанні, якія ставіць складанае грамадства; здольных выходзіць за рамкі прывычных схем; здольных станавіцца пастырамі і вучнямі, якія “прымаюць на сябе рысы Езуса: лагоднасць, пакору, увагу да патрэб іншых людзей, блізкасць”, лічыць кардынал Паралін.

“Свет мае патрэбу ў пастырах чалавечных, па-сапраўднаму свабодных, якія ўмеюць жыць мірнымі міжасабовымі зносінамі. Чалавек міру і згоды – гэта знак Божай ласкавасці. Нам патрэбныя пасярэднікі, якія ўмеюць быць блізкімі да людзей”, - падкрэсліў бліжэйшы супрацоўнік Святога Айца.

Навіна ў фармаце аўдыё
22 лістапада 2018, 13:06