Касцёл Панамы гатовы пасрэднічаць у вырашэнні канфлікту
Аляксандр Амяльчэня - Vatican News
Паводле паведамлення на сайце прэзідэнцкай адміністрацыі, старшыня Канферэнцыі Біскупаў Панамы падкрэсліў, што "Касцёл жадае дапамагчы вырашыць праблемы ў краіне". 10 чэрвеня 2025 года іерарх плануе правесці першую сустрэчу з прадстаўнікамі прафсаюзаў. Яго падтрымае рабін Густава Красельнік, старшыня Міжрэлігійнага камітэта Панамы.
У цэнтральнаамерыканскай краіне ўжо некалькі тыдняў працягваюцца пратэсты. Яны датычаць спрэчнага аднаўлення буйнога праекта па здабычы медзі, пытання дзяржаўнага суверэнітэту над Панамскім каналам, на які прэтэндуе цяперашняя адміністрацыя ЗША, а таксама забастоўкі на плантацыі буйнога вытворцы бананаў “Chiquita”.
Там каля 5000 працаўнікоў былі звольнены без папярэджання пасля некалькіх дзён забастоўкі ў Бокас-дэль-Тора. Кампанія абгрунтавала гэта тым, што плантацыя стала непрыдатнай з прычыны забастоўкі, але прафсаюзныя дзеячы не згаджаюцца з такім тлумачэннем.
Ёсць паведамленні пра злоўжыванні з боку паліцыі, адзін прафсаюзны дзеяч вымушаны быў шукаць прытулку ў адным з пасольстваў. Забастоўкі прывялі да значных абмежаванняў у многіх частках краіны.
