Каталіцкі рух дапаможа мігрантам знайсці працу ў Італіі
Аляксандр Амяльчэня - Vatican News
Як паведамляе прэс-служба арганізацыі, новая ініцыятыва рэалізуецца на падставе пратакола, падпісанага ў красавіку 2024 года з італьянскімі міністэрствамі ўнутраных спраў, замежных спраў і працы. Супрацоўніцтва наладжана з кадравым агенцтвам Manpower і кампаніяй Mays International, якая спецыялізуецца на кіраванні міжнароднымі праграмамі.
Галоўная задача – адбор кандыдатаў для легальнай працоўнай міграцыі, уключаючы прафесійнае навучанне і развіццё, каб задаволіць патрэбы італьянскіх прадпрыемстваў.
На першым этапе праграма ахопіць тры краіны: Кот-д'Івуар, Ліван і Эфіопію. У Кот-д'Івуар ужо накіравалася група прадстаўнікоў супольнасці і Mays International. Плануецца адабраць 300 электрамеханікаў, у якіх маюць патрэбу італьянскія прадпрыемствы.
Каталіцкая супольнасць будзе выкарыстоўваць мадэль прыёму і інтэграцыі, якая паспяхова зарэкамендавала сябе ў выпадку гуманітарных калідораў. Дзякуючы гэтай мадэлі амаль 8 тысяч уцекачоў змаглі легальна пасяліцца ў Італіі, Францыі, Бельгіі і Андоры.
