Святло надзеі Юбілейнага года ў 200 турмах Італіі
Аляксандр Амяльчэня - Vatican News
На працягу студзеня ва ўсіх рэгіёнах Італіі прайшлі ўрачыстыя набажэнствы з удзелам мясцовых біскупаў, падчас якіх Лампады надзеі былі перададзены капеланам для кожнай турмы.
"У нашых пенітэнцыярных установах, дзе пануе смутак зняволення, такія мерапрыемствы асаблівым чынам адраджаюць надзею ў зняволеных, бо яны ведаюць, што Касцёл побач з імі", - падкрэслівае генеральны інспектар капеланаў італьянскіх турмаў ксёндз Рафаэле Грымальдзі.
Спецыяльная Юбілейная камісія, створаная для арганізацыі мерапрыемстваў у турмах, будзе рыхтаваць розныя тэматычныя дні, прысвечаныя хворым, мігрантам, моладзі і спорту. Кожная ўстанова зможа адаптаваць праграму пад свае магчымасці і патрэбы.
"Юбілей – гэта выдатная магчымасць для ўстаноў выйсці з той замкнёнасці, якая спараджае не надзею, а хутчэй дэпрэсію", - адзначае ксёндз Грымальдзі.
Адметнасцю Юбілейнага года ў італьянскіх турмах стане штомесячная рассылка спецыяльных катэхетычных матэрыялаў, падрыхтаваных Юбілейнай камісіяй. Упершыню ў гісторыі ўсе 200 пенітэнцыярных устаноў краіны будуць ісці адным духоўным шляхам, які завершыцца агульным святкаваннем Юбілею зняволеных 14 снежня 2025 года.