У сталіцы Партугаліі паўстане Парк імя Папы Францішка
Аляксандр Панчанка - Vatican News
Рыкарду Леау, мэр муніцыпалітэта Лурэш, словы якога прыводзіць агенцтва KAI, паведаміў, што парк, названы ў гонар Святога Айца, плануецца адкрыць у лютым 2025 года. Ён выказаў надзею, што ў будучым гэта месца будзе прыцягваць як жыхароў сталічнага мегаполіса, так і турыстаў, якія прыязджаюць у Лісабон.
У 2024 годзе афіцыйныя асобы Лісабона неаднаразова высока ацэньвалі арганізацыю Сусветных дзён моладзі ў Лісабоне, падкрэсліваючы ўплыў гэтай падзеі на прасоўванне горада і Партугаліі.
Па словах мэра партугальскай сталіцы Карлуша Маэдаша, лісабонскі аб’екты, звязаныя з арганізацыяй гэтага найбуйнейшага мерапрыемства для маладых католікаў, карыстаюцца вялікай папулярнасцю ў турыстаў, якія наведваюць горад.
Паводле дадзеных партугальскага ўрада і эканамічных арганізацый, мінулы год стаў рэкордным па колькасці турыстаў, якія наведалі Партугалію. Паводле іх звестак, у 2024 годзе ў Партугаліі адпачыла больш за 30 мільёнаў замежных турыстаў, большасць з іх – у сталічным рэгіёне Лісабона.
