1000 рэлігійных лідараў ЗША заклікалі да перамір'я ва Украіне

Аляксандр Амяльчэня - Vatican News

“Мы заклікаем наш урад узяць на сябе ініцыятыву ў спыненні вайны ва Украіне, падтрымаўшы заклікі да спынення агню і ўрэгулявання шляхам перамоў да таго, як гэты канфлікт скончыцца ядзерным сутыкненнем”, - гаворыцца ў заяве.

Арганізатары акцыі спасылаюцца на каляднае перамір'е 1914 года, падчас Першай сусветнай вайны. У той час урады праігнаравалі заклік Папы Бэнэдыкта XV, але жаўнеры, якія стаялі ў акопах, далучыліся да святкавання і дамовіліся аб спыненні агню паміж сабой.

Адна з суарганізатараў акцыі Медэя Бенджамін заўважыла, што гаворка ідзе не толькі пра перамір'е, але і пра перамовы. “Яны не з'яўляюцца эўфемізмам, які б азначаў капітуляцыю або рацыяналізацыю агрэсіі Пуціна. Перамовы – гэта проста прызнанне таго факту, што канец гэтага канфлікту недасягальны праз вайну”, - заявіла яна.