Каталіцкія і англіканскія біскупы ў абароне правоў бежанцаў
Аляксандр Амяльчэня - Vatican News
З ініцыятывай выступілі шэсць іерархаў, дыяцэзіі якіх знаходзяцца ў прыбярэжных рэгіёнах абедзвюх краін. Не толькі Міжземнае мора становіцца магілай для мігрантаў, драматычныя сцэны таксама адбываюцца ў Ла-Маншы, - звярнулі ўвагу яны.
"Мігранты з'яўляюцца нашымі братамі і сёстрамі па чалавецтве і заслугоўваюць дапамогі ў пошуку месца, дзе змогуць жыць годна і ўносіць свой уклад у пабудову грамадзянскай супольнасці", - гаворыцца ў дакуменце, апублікаваным на сайце Лільскай архідыяцэзіі.
Каталіцкія і англіканскія лідары звярнулі ўвагу на неабходнасць умення чуць голас замежнікаў, вымушаных пакідаць сваю радзіму. Іерархі асабліва шкадуюць аб адсутнасці надзеі ў мігрантаў і бежанцаў; менавіта адчай падштурхоўвае іх звяртацца да кантрабандыстаў, якія нажываюцца на іх горы. З іншага боку ёсць і тыя, хто шчодра прапануе канкрэтную падтрымку, жыллё, час і кампетэнтнасць. Гэтыя людзі ўзвышаюцца над аргументамі, поўнымі стэрэатыпаў і страху, і паказваюць кірунак канструктыўнай палітыкі.
Таксама біскупы запрасілі да малітвы і аб'яднання намаганняў на карысць лепшага стаўлення да ахвяр канфліктаў. Яны заклікалі жыхароў рэгіёнаў, размешчаных у зоне Ла-Манша, стварыць атмасферу ветлівасці і паразумення ў адносінах да бежанцаў, падзяляючы тым самым надзеі і патрэбы ўсяго чалавецтва.
Каталіцка-англіканскі зварот быў апублікаваны на наступны дзень пасля таго, як французскія службы выратавалі 80 мігрантаў, якія спрабавалі перасекчы Ла-Манш.
