Святы Пасад: смерць Вэнсана Ламбэра – параза для чалавецтва
Кіраўнік Залы Друку Святога Пасаду паведаміў журналістам, што ў Ватыкане з болем прынялі навіну пра смерць Вэнсана Ламбэра.
“Мы молімся, каб Пан прыняў яго ў свой дом і выказваем блізкасць яго родным, а таксама ўсім, хто да апошняга падтрымліваў яго з любоўю і адданасцю. Будзем памятаць і паўторым тое, што сказаў Святы Айцец адносна гэтай балючай справы: Бог – адзіны гаспадар жыцця ад пачатку да натуральнай смерці, а наш абавязак – заўсёды бараніць яго і не скарацца перад культурай адчужэння”, - дадаў Алесандра Джызоці.
Папская акадэмія жыцця назвала смерць Ламбэра і яго гісторыю “паразай для нашага чалавецтва”. Адмысловае паведамленне было апублікавана на старонцы гэтай ватыканскай установы ў сацыяльнай сетцы “Твітэр”.
Вэнсан Ламбэр знаходзіўся ў коме з 2008 г., пасля таго як трапіў у сур’ёзнае дарожнае здарэнне. Пасля доўгіх цяжбаў, французскія судовыя органы пастанавілі адключыць яго ад сістэмы штучнага харчавання і гідратацыі.