Пошук

Vatican News
Плакат ватыканскай выставы ў Пекіне Плакат ватыканскай выставы ў Пекіне 

Ватыканскія музеі з выставай у сталіцы Кітая

Ватыканскія музеі і пекінскі Palace Museum прадставяць 28 мая 2019 г. у кітайскай сталіцы сумесную выставу. Упершыню папская мастацкая ўстанова ладзіць такую ініцыятыву ў Кітаі.

Як заявілі арганізатары, “такога роду супрацоўніцтва ўяўляе сабой канкрэтны жэст, які мае высокую сімвалічную каштоўнасць”.

На выставе Прыгажосць аб’ядноўвае нас – кітайскае мастацтва з Ватыканскіх музеяў (Beauty Unites Us – Chinese Art from the Vatican Museums) будуць прадстаўлены экспанаты так званай “кітайскай калекцыі” з дэпартаменту Anima Mundi. Яна ўключыла ў сябе семдзесят шэсць твораў свецкага, будысцкага і каталіцкага мастацтва. Сімвалічна, што ўсе яны будуць змешчаны ў выставачнай прасторы пекінскага архітэктурнага комплексу Забаронены горад, самага вялікага палацавага комплексу ў свеце.

Асаблівае значэнне мае група твораў кітайскіх мастакоў, якія сведчаць аб сустрэчы паміж хрысціянствам і традыцыямі Кітая, - гаворыцца ў прэс-рэлізе ініцыятывы. Таксама з Ватыканскай пінакатэкі прывезлі два незвычайных, арыгінальных шэдэўры: Адпачынак на шляху ў Егіпет Фэдэрыка Барочы і Адам і Ева ў Эдэмскім садзе Пэтэра Венцэля.

Укладам Palace Museum у выставу сталі творы кітайскага каталіцкага мастака Ву Лі і езуіта з Мілана Джузэпэ Касцільёнэ, вядомага ў Кітаі пад імем Ланг Шынінг, якія жылі і працавалі ў Паднябеснай у XVII-XVIII стагоддзях.

Навіна ў фармаце аўдыё
27 мая 2019, 11:46